Sut il presidi da deputà Fabrizio Keller, Grono, ha la cumissiun predeliberanta dal cussegl grond en preschientscha da cussegliera guvernativa Eveline Widmer-Schlumpf discutà la participaziun dal chantun a la nova Swiss (fin uss Crossair) per mauns dal cussegl grond.
En quest project sa tracti da decider davart in credit dad 1.14 milliuns francs per cumprar aczias da la nova Swiss Airlines tras il chantun. Quest import vegn calculà sin basa d'ina clav ch'ha elavurà la conferenza da las directuras e dals directurs chantunals da finanzas. La clav resguarda l'entrada naziunala dals chantuns, il dumber d'abitants sco er la distanza dal chantun a l'eroport.
En la cumissiun predeliberanta èsi vegnì accentuà ch'i na possia betg sa tractar sulettamain da la dumonda, sche la participaziun decisiva da la confederaziun e dals chantuns al chapital d'aczias da la Swiss saja gista ord vista da l'urden politic. I sa tractia sulettamain da decider, sch'il Grischun, ensemen cun (la gronda part dals) auters chantuns, veglia gidar a laschar exister vinavant ina societad aviatica svizra da format internaziunal. Ils commembers da la cumissiun predeliberanta n'han dentant betg gì dubis da respunder questa dumonda. Els han beneventà dal tuttafatg l'engaschament d'aczias. Els chapeschan quel sco act da solidaritad envers il chantun Turitg pertutgà e sco signal d'in federalissem activ. La cumissiun predeliberanta ha accentuà ch'il chantun Grischun profiteschia en bleras manieras d'in ferm chantun Turitg. Numerus turists da stad e d'enviern da la regiun gronda da Turitg passentan ina part da lur vacanzas en noss chantun. Bleras Grischunas e blers Grischuns fan diever da la purschida da furmaziun (supplementara) a Turitg, da la quala na vegnan savens betg mess a quint tut ils custs. Finalmain ha la cumissiun mussà cun agid d'exempels concrets che differentas vischnancas dal chantun Turitg han laschà provegnir al Grischun resp. a las vischnancas flaivlas da finanzas en il chantun il multipel da l'import che stat en discussiun, e quai tras l'instituziun da las vischnancas da padrinadi. La participaziun dal chantun al chapital d'aczias en il senn d'in act da bun vischin e d'in act solidar saja schizunt necessaria.
Tuttina èn intgins votums critics sa fatschentads cun ils eveniments pertutgant la Swissair e ses grounding dals 2 e 3 d'october 2001. Ma ins ha accentuà che quests eveniments sajan da separar cleramain da la preschenta fatschenta.
La cumissiun predeliberanta recumonda unanimamain al cussegl grond d'acceptar il project e d'approvar il credit proponì. La fatschenta vegn tractada la proxima sessiun che dura dals 25 fin ils 27 da mars 2002.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond