La regenza sustegna il concept per realisar il plaz d'ospitals a
Cuira. El è ina basa cunvegnenta per in provediment medicinal confurm al
basegn e d'auta qualitad per la populaziun da l'entira regiun
cumpigliada e quai a custs pli favuraivels pussaivels.
Envers la cumissiun communabla d'ospitals "Ospitals da Cuira" ch'è
ina societad simpla piglia la regenza posiziun davart il concept per
realisar il plaz d'ospitals a Cuira. Ella fa quai en il num dal chantun
ch'è purtader da l'ospital da dunnas Fontana. Il concept da realisaziun
correspunda a l'optimaziun da las prestaziuns da l'ospital chantunal,
l'ospital da la Crusch e da l'ospital da dunnas Fontana ch'è vegnida
pretendida gia dapi ditg sin plaun politic.
Sin plaun administrativ e giuridic mussa il concept co ch'ins po dar
ina furma pli effizienta a l'organisaziun fitg cumplexa dal plaz
d'ospitals a Cuira. Sin il sectur medicinal vegni preschentà co ch'igl è
da reparter las disciplinas chirurgicas e medicinalas tranter ils trais
ospitals per pudair eliminar tuttas duplicitads. Per quest intent vegnan
creads centers da cumpetenza per propi che duain avair in effect positiv
sin la qualitad medicinala e sin l'ulteriur svilup. En la part economica
vegnan explitgads ils effects ch'han probablamain per consequenza ina
reducziun dals custs.
Intgins dals elements ils pli impurtants dal concept da realisaziun
che vegnan beneventads expressivamain da la regenza èn ils suandants:
- Ils trais purtaders d'ospitals (tuts fundaziuns) fundeschan ina
societad da manaschi communabla en furma d'ina SA. La societad da
manaschi entschaiva sia lavur il pli baud l'entschatta 2003, la
realisaziun dal plaz d'ospitals a Cuira succeda aifer trais fin tschintg
onns.
- Ils trais purtaders ch'èn fundaziuns stipuleschan cun la nova
societad da manaschi mintgamai in contract da management identic. Questa
schliaziun exista gia tranter l'ospital chantunal e l'ospital Fontana ed
è sa cumprovada. Per elavurar ils contracts da management vegn furmada
ina nova gruppa da lavur.
- La proprietad da las immobiglias e da las installaziuns resta er
vinavant tar las fundaziuns.
- La societad da manaschi maina la contabilitad da finanzas e da
manaschi cun mintgamai in circul da contabilitad separà per mintga
ospital.
- En la nova glista d'ospitals tenor LAM ch'è da classifitgar en
categorias tenor las incaricas da prestaziun tegna il chantun quint da
la coordinaziun previsa da las disciplinas tranter ils trais ospitals.
Mintga purtader d'in ospital obtegna ina atgna incarica da prestaziun
dal chantun.
- Per elavurar il concept previs da las disciplinas vegnan
consultadas las persunas medicinalas e spezialisadas ch'èn participadas
mintgamai.
L'ospital da la Crusch duai prender ina posiziun clera
La varianta ch'è vegnida messa en discussiun dals exponents da
l'ospital da la Crusch da vender l'ospital u da surdar la gestiun da
l'ospital da la Crusch a la gruppa Hirslanden na s'accorda tenor l'avis
da la regenza ni cun las finamiras e prescripziuns dal cussegl grond e
da la corporaziun da vischnancas da la Val dal Rain grischuna, ni cun
las finamiras ed ils princips da la politica da sanadad da la regenza.
Da la fundaziun ospital da la Crusch Cuira spetga la regenza ch'ella
prendia posiziun fin ils 20 d'avrigl davart il concept per realisar il
plaz d'ospitals a Cuira e ch'ella sa decidia a moda impegnativa. En il
rom da la procedura da consultaziun pudess l'ospital da la Crusch metter
en discussiun tschertas variantas. La regenza rinviescha qua dentant al
fatg che las premissas per ch'il chantun possia conceder contribuziuns
da manaschi na vegnissan betg pli ademplidas, sche l'ospital da la
Crusch vegniss manà da la gruppa Hirslanden.
Consultaziuns a la confederaziun
La regenza beneventa las midadas planisadas da l'ordinaziun per
mantegnair l'aria pura. Las novaziuns èn adattaziuns necessarias als
protocols da Montreal e da Kyoto che la Svizra è s'obligada da realisar.
Ils protocols han l'intenziun da proteger la stresa d'ozon e da limitar
l'effect da serra. Il traffic illegal cun materias che reduceschan la
stresa d'ozon duai vegnir interrut tras licenzas d'import e d'export.
Ils dissolvents bromclormetan e l'insecticid bromid metilic duain vegnir
scumandads. Installaziuns sin ils champs da la frigotecnica e da la
climatisaziun na duain betg pli dastgair vegnir provedids cun FCKW e
davent da l'onn 2015 er betg pli cun HFCKW.
La regenza sustegna er la midada da l'ordinaziun davart la taxa
directiva sin substanzas svapurantas. L'entschatta da l'onn 2003 vegn la
tariffa da consegna augmentada tenor plan dad actualmain dus francs sin
trais francs per kilogram VOC (volatile organic compounds = cumbinaziun
organica svapuranta). Per il medem termin duai vegnir engrondì il circul
da quellas firmas che pon retrair ad interim VOC senza taxa. Per quest
intent vegn reducida la limita dad actualmain 200 tonnas sin novamain 50
tonnas. La regenza beneventa questa proposta en il senn d'in cumpromiss
supportabel. Ins na duess dentant betg ir sut la limita da 50 tonnas.
7.8 milliuns per projects da vias
Per differents projects da vias en il chantun vegnan dads libers
credits d'in import total da 7.8 milliuns francs (renovaziun da la
colliaziun Landquart ost a la A13a, mantegniment da la via d'Avras,
sanaziun da la via da la Tumleastga entaifer il vitg da Seglias, lavurs
da cuvrida sin la via dal Güglia entaifer il vitg da Malix, mantegniment
da la via sursilvana tranter Valendau e Castrisch, amplificaziun da la
via da Stussavgia tranter Türlihus ed Arezen, mir da sustegn Mulins
tranter Vinadi e Samignun e lavurs d'impressari per il sviament da
Claustra).
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun