L'uffizi forestal dal Grischun ha fatg ina retschertga tar sia "clientella" davart las prestaziuns dal servetsch forestal chantunal. Il resultat è bun.
En il rom dal project chantunal da pilot GRiforma che vegn fatg per examinar ina administraziun orientada tenor l'effizienza e tenor la clientella, ha l'uffizi forestal fatg la davosa stad per la segunda giada ina retschertga tar ils selviculturs da revier e tar ils responsabels communals per il guaud. La retschertga sa referiva a tut las prestaziuns dal servetsch forestal chantunal.
Cun la finamira da dumandar mo pauc dals clients e d'obtegnair tuttina respostas utilisablas a 100 pertschient, è la retschertga vegnida fatga en furma d'intervistas. Perquai che quai dumandava blera lavur, èn ins sa decidids per ina retschertga cun emprovas da controlla tar in quart dals reviers forestals (28 reviers). Per revier è vegnì interrogà il selvicultur da revier ed in commember da l'autoritad cumpetenta per il guaud. Las intervistas èn vegnidas fatgas dals dus inschigners forestals independents Romano Costa e Gian Cla Feuerstein. L'evaluaziun è vegnida fatga da l'uffizi forestal.

En general fitg buns resultats
Ils resultats èn stads en general fitg buns e conferman ils resultats da l'enquista da l'onn precedent. Tant tar l'impressiun cumplessiva sco er tar las cifras medias da las valitaziuns detagliadas è vegnida surpassada per part cleramain la prescripziun dal NPM da cuntanscher ch'almain 80 pertschient da las prestaziuns vegnian consideradas sco cuntentaivlas.

La cumparegliaziun da l'impurtanza da las prestaziuns da servetsch cun la cuntentezza dals retschaviders da las prestaziuns ha dà scleriment, sch'il servetsch forestal haja mess las prioritads al dretg lieu. Las prestaziuns da servetsch impurtantas èn vegnidas furnidas à 95.6 pertschient cun buna u cuntentaivla satisfacziun. Evidentamain è la qualitad da las prestaziuns sa reducida parallelamain a la sminuziun da l'impurtanza. Ella è dentant vegnida valitada per passa 87 pertschient sco cuntentaivla u buna er en connex cun prestaziuns "nunimpurtantas".

La valitaziun detagliada mussa pussaivladads per meglierar
Meglieradas pon vegnir "la clerezza da las cumpetenzas" e la "spertadad da las prestaziuns da servetsch". "La spertadad da las prestaziuns da servetsch" e surtut la "cuntanschibladad" dals referendaris han ils posts exteriurs dal servetsch forestal medemamain valità sco meglierablas. Intginas remartgas criticas han rinvià a meglieraziuns che surpassan il sectur dals criteris fixads. E tschertas propostas èn vegnidas prendidas serius ed han manà ad ina glista d'intenziuns concretas.

Constataziuns cuntradictorias davart il svilup da l'organisaziun
Las dumondas davart il svilup da l'organisaziun obtegnan respostas cuntradictorias. Schebain ch'ins è stà generalmain da l'avis che las prestaziuns dal servetsch forestal chantunal sajan daventadas meglras u sajan restadas bunas, han las persunas interrogadas prendì ina posiziun magari sceptica envers la reorganisaziun. Questa sceptica duess vegnir cumbattida cun ina meglra communicaziun da las mesiras da reorganisaziun e cun anc meglras prestaziuns da servetsch da l'uffizi forestal.

Ina buna basa per retschertgas futuras
La nova furma d'ina retschertga tar la clientella è sa cumprovada ed è vegnida appreziada surtut er da las persunas interrogadas. Igl è reussì da standardisar la registraziun e l'evaluaziun da las intervistas uschia che las interrogaziuns futuras tenor il medem model pon vegnir analisadas spert e ch'igl è pussaivel da far ina buna cumparegliaziun cun ils resultats da l'onn precedent. La proxima retschertga entschaiva questa primavaira.

Gremi: uffizi forestal dal Grischun
Funtauna: rg uffizi forestal dal Grischun