Ina analisa da l'uffizi chantunal da construcziun auta en collavuraziun cun la cussegliaziun da construcziun da la Pro Infirmis dal Grischun e cun la federaziun grischuna d'impedids mussa ch'igl exista il basegn d'agir tar varsaquants edifizis dal chantun. Igl è da quintar cun custs totals da radund 12 milliuns francs.

Adina dapli umans cun impediments vivan a moda independenta ed autonoma. Lur integraziun na dastga betg vegnir engrevgiada u schizunt impedida tras obstachels da construcziun. Impedids da chaminar, umans en sutgas cun rodas, persunas cun deblezzas da la vesida e tschorvs, persunas da flaivl'udida e surds èn cunzunt pertutgads. Per pudair meglierar la situaziun en ils edifizis dal chantun han ins fatg ina analisa correspundenta che fixescha er il basegn finanzial e las prioritads. Ils obstachels da construcziun per las persunas impedidas duain vegnir allontanads cuntinuadamain.

Ils criteris da l'examinaziun
171 edifizis (126 objects dal chantun e 45 fittads) èn vegnids examinads. Sulettamain tar 34 objects han ins pudì constatar ch'els correspundan cumplainamain als basegns da las persunas impedidas.
L'analisa è succedida tenor ils criteris suandants:
- parcadi: tenor ils basegns da las persunas impedidas, colliaziun transibla per sutgas cun rodas cun l'edifizi
- entrada: entrada principala senza obstachels
- plaunterren: pussaivladad da discussiun en il plaunterren, tualetta en il plaunterren che correspunda als basegns da las persunas impedidas
- access: ascensur, corridors, savas che correspundan als basegns da las persunas impedidas
- ischs: ladezza minimala dad 80 cm

Sanaziuns entaifer ils proxims diesch onns
En il cas normal stoi esser pussaivel da parcar en la vischinanza da l'entrada da l'edifizi, da cuntanscher senza obstachels l'entrada da l'edifizi e da cuntanscher e da duvrar ils spurtegls ed ils locals da discussiun senza barrieras da construcziun. Las expensas per allontanar ils obstachels da construcziun èn vegnidas priorisadas sco suonda: fitg urgent (pretensiuns minimalas), urgent, a termin mesaun ed a lung termin. Repartids sin las differentas categorias resultan ils suandants custs:
- fitg urgent: circa 1.5 milliuns francs
- urgent: circa 1.6 milliuns francs
- a termin mesaun: circa 6.5 milliuns francs
- a lung termin: circa 3.1 milliuns francs
Sco finamira realistica per la realisaziun da las mesiras da construcziun necessarias pon ins supponer in spazi da temp da trais onns. Pertutgant las categorias restantas èn necessaris ulteriurs sis onns. Resalvà è il consentiment dal cussegl grond en il rom da la procedura dal preventiv, las tractativas cun ils affitaders (en connex cun ils objects d'affitaziun) sco er la procedura da permissiun.

Gremi: departament da construcziun, traffic e selvicultura
Funtauna: rg uffizi da construcziun auta