Per activitads culturalas vegnan pajadas contribuziuns en la summa totala da circa 112'000 francs:
- a la Cuminanza da lavur grischuna da cudeschs per la giuventetgna,
- a visarte Grischun per contribuziuns da stipendi a persunas activas sin il champ cultural che fan diever dal atelier Lardelli a Paris,
- a la Societad per la perscrutaziun da la cultura grischuna vi dal project "Bündner Filme",
- a la Societad istorica dal Grischun vid la publicaziun d'in cudesch da funtauna tar l'istorgia grischuna l'onn da giubileum 2003,
- vi dals custs da producziun da l'exposiziun ambulanta "Kleine Kinder - Lust&Last" che vegn mussada dals 19 d'avrigl fin ils 2 da zercladur en il museum da la natira, e
- vi da la cumpra da l'ovra fotografica "Landscape (Traffic 35)" da Kurt Caviezel.

Agid umanitar
A las sequentas organisaziuns d'agid resp. als sequents projects d'agid vegnan concedidas contribuziuns en la summa totala da 14'000 francs:
- Swissaid en favur dal project da nutriment "Extension II/III" a Guinea-Bissau.
- Uniun EcoSolidar en favur dal project da svilup "Bolivia 2003",
- Uniun d'agid cun medicaments ed instruments medicinals e d'ospital per la Rumenia e
- Servetsch per Svizzers a l'exteriur dal departament federal dals affars exteriurs en favur da societads d'agid svizras a l'exteriur.

Consultaziun per mauns da la confederaziun
La regenza prenda posiziun davart il sboz da l'ordinaziun tar la lescha federala davart las legitimaziuns per burgais svizzers (ordinaziun da legitimaziun). Il sboz vegn da princip approvà. La reglamentaziun da las tariffas na persvada dentant betg. Tenor l'avis da la regenza sto ella vegnir reponderada e repassada totalmain. Las tariffas duessan vegnir fixadas tenor il princip da cuvrida dals custs.

Da las vischnancas
Il concept general ed il program da spazi da la fundaziun scola-dimora Cuira per la renovaziun e la sanaziun energetica da la chasa dal persunal e da l'edifizi d'internat a la Via Masans 205 a Cuira vegnan da princip approvads. Ins quinta cun custs d'investiziun da circa 2.4 milliuns francs. Vi dals custs betg cuvrids tras contribuziuns federalas vegn mess en vista ina contribuziun chantunala dad 80 pertschient.
La constituziun communala da Flem vegn approvada.
Per differents projects da construcziun da vias en il chantun han ins deliberà credits en la summa totala da circa 15 milliuns (nova construcziun punt sur il Glogn a Peiden Bogn, via provisoria per il traffic conc. il sviament da Saas, restauraziun tunnel da Rofla A13, lavurs da cuvrida access Nufenen-Fuchstobel A13, engrondiment via locala Valragn, bagnola da betun armà Panaduz, sanaziun/engrondiment via chantunala a Tschlin, cuvrida Glaris-Frauenkirch, sanaziun via da Schuders, engrondiment via da colliaziun Grono-Nadro, mantegiment vias da colliaziun Rueun-Siat e Vuorz-Andiast).

Fatgs dal persunal
A la fin da mars van en pensiun ils sequents emploiads chantunals:
- Eduard Barsa, Cuira, inschigner EED tar l'uffizi da construcziun bassa,
- Gion Denoth, Zernez, guardiaselvaschina tar l'uffizi da chatscha e pestga,
- Ugo Pedrini, Roveredo, policist chantunal
- Lüzza Rauch, Scuol, inschigner forestal tar l'uffizi forestal circuital Scuol.
La regenza als engrazia per lur servetschs prestads en favur dal chantun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun