La cumissiun predeliberanta dal cussegl grond ha tractà avant pauc temp il messadi concernent la revisiun totala da l'ordinaziun executiva davart ils fatgs da stadi civil sut il presidi da deputà Aldo Tuor (Mustér) ed en preschientscha da cusseglier guvernativ Peter Aliesch sco er da represchentants da l'administraziun chantunala.
La cumissiun predeliberanta propona al cussegl grond d'entrar en il project. Ella è sco la regenza da l'opiniun che las midadas en la legislaziun federala pretendian urgentamain ina revisiun da l'ordinaziun chantunala davart ils fatgs da stadi civil, e quai uschè speditivamain sco pussaivel. Questa urgenza è d'attribuir spezialmain al fatg ch'ins vul realisar l'onn proxim ina banca da datas per il stadi civil en l'entira Svizra. Cun quest project vegnan ils registers sin palpiri, usitads fin uss, remplazzads tras ina banca da datas centrala per il stadi civil. La confederaziun prescriva ultra da quai in grad d'occupaziun minimal da 40 pertschient per ils uffiziants e las uffiziantas da stadi civil. En il Grischun èn consequentamain gia divers uffizis da stadi civil s'unids tar uffizis cirquitals u da pliras vischnancas.
Il princip da la structuraziun locala dals circuls da stadi civil è vegnì discutà detagliadamain en las deliberaziuns da la cumissiun. La cumissiun ha la finala suandà unanimain la proposta da la regenza d'organisar ils uffizis civils per regla tenor ils circuls. A moda flexibla e pragmatica pon er vegnir realisadas autras cumbinaziuns che resguardan las relaziuns regiunalas. Uschia duai esser pussaivel da crear plirs uffizis da stadi civil entaifer in circul politic, d'integrar singulas vischnancas en in uffizi da stadi civil d'in auter circul u d'unir plirs circuls politics tar in sulet circul da stadi civil. Cun questa schliaziun flexibla ed averta obtegnan las vischnancas la pli gronda libertad pussaivla per reorganisar ils uffizis da stadi civil. Uschia èsi er pussaivel da chattar ina schliaziun che cuntenta la clientella, in giavisch fitg impurtant per la cumissiun.
La revisiun da l'ordinaziun chantunala davart ils fatgs da stadi civil vegn tractada dal cussegl grond en la sessiun dal schaner. Cun la revisiun proponida da la regenza e deliberada da la cumissiun vegnan las structuras chantunalas adattadas a las pretensiuns dal dretg federal.

Gremi: Cumissiun predeliberanta dal cussegl grond
Funtauna: rg Cumissiun predeliberanta dal cussegl grond