Cun la nova legislaziun forestala è era vegnì introducì in nov concept da planisaziun forestala. En il plan da svilup dal guaud vegnan regladas las diversas utilisaziuns dal guaud cun integrar ils interess publics, las finamiras a lunga vista e las strategias per la cultivaziun dal guaud. Il servetsch forestal chantunal vegn ad infurmar ils 17 d'avrigl 2000 a Puschlav las vischnancas, la publicitad e las gruppas d'interess pertutgadas davart il sboz da planisaziun per la Val Puschlav e davart l'ulteriura procedura.

Cun la nova lescha forestala chantunala è vegnì adattà il concept da planisaziun forestala ed enstagl dals plans d'utilisaziun da fin uss èn vegnids introducids ils plans regiunals da svilup dal guaud (PSG) ed ils plans forestals da manaschi.
Il plan da svilup dal guaud per la Val Puschlav è vegnì fatg en ina lavur ch'ha durà dus onns sut la direc-ziun da l'uffizi forestal tras l'inschigner forestal regiunal per la Val Puschlav, Gilbert Berchier. Il plan da svilup dal guaud è valaivel per l'entir areal forestal en la Val Puschlav. Il plan consista d'in concept directiv cumplessiv e dad otg fegls d'object cun plans correspundents. El registrescha e coordinescha las diversas pretaisas envers il guaud.
Il concept directiv fixescha co ch'ils guauds duain vegnir cultivads en il futur en la Val Puschlav. Ils giavischs spezials e las mesiras da cultivaziun èn cuntegnids en ils otg fegls d'object ed en ils plans appartenents 1:25'000. Ils sequents temas vegnan tractads a moda pli detagliada:
- protecziun cunter privels da la natira
- producziun da laina
- protecziun da la natira e da la patria
- recreaziun e turissem
- agricoltura
- selvaschina e chatscha
- projects
- basegn da coordinaziun e conflicts

Tenor la descripziun da la situaziun vegnan formuladas finamiras e strategias, vegnan descrits il basegn da coordinaziun ed ils conflicts e vegnan fixadas las dimensiuns da las controllas.
Suenter l'occurrenza d'infurmaziun vegn il sboz da planisaziun exponì en las vischnancas pertutgadas per l'orientaziun e per prender invista tar l'uffizi forestal dal Grischun meridiunal a Puschlav u tar l'uffizi forestal dal GR a Cuira. Ultra da quai va el en consultaziun tar ils uffizis chantunals. Uschia han gruppaziuns interessadas anc ina giada la pussaivladad d'exprimer critica, giavischs ed impuls.
Sin fundament da las posiziuns entradas vegn fatg il plan definitiv da svilup dal guaud per la Val Puschlav, e quai cun la cooperaziun dals circuls pertutgads fin l'atun 2002; silsuenter vegn quel suttamess a las vischnancas ed a la regenza per l'approvaziun.
En ils proxims onns po il servetsch forestal local elavurar sin fundament da questa basa impegnativa per las autoritads ils plans da manaschi per ils singuls reviers forestals u per ils singuls possessurs da guaud. En questa planisaziun da manaschi vegnan evaluadas las datas e las prescripziuns per il singul manaschi forestal e fixadas tras ina planisaziun da manaschi a media vista.

Gremi: departament da construcziun, traffic e selvicultura dal Grischun
Funtauna: rg uffizi forestal