Sut il presidi da deputà Christoph Suenderhauf, Cuira, ed en preschientscha dal president da la regenza Claudio Lardi ha ina cumissiun predeliberanta dal cussegl grond tractà la missiva ed il sboz per la revisiun parziala da l'ordinaziun davart la renconuschientscha statala dals certificats da la scol'auta da teologia a Cuira. La cumissiun propona al cussegl grond unanimamain da tractar il project e d'approvar la revisiun parziala da l'ordinaziun.
En il center da la revisiun parziala è ch'il chantun paja da nov contribuziuns a la scol'auta da teologia a Cuira. Il project tegna uschia quint d'in giavisch ch'il cussegl grond ha inoltrà 2001 sco moziun. La cumissiun predeliberanta taxescha la scol'auta da teologia a Cuira sco scol'auta impurtanta per il chantun Grischun. I saja giustifitgà da sustegnair sia existenza futura cun contribuziuns chantunala. Il nov concept da la scol'auta ch'è vegnì preschentà a la cumissiun predeliberanta sa lascha taxar tenor l'idea da la cumissiun sco model ch'empermetta success. El cumpiglia pliras inclinaziuns ecumenas e garantescha da mantegnair l'auta qualitad d'instrucziun che vegn er attestada d'experts externs.

Il cussegl grond vegn a s'occupar dals projects durant la sessiun da matg 2002.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond