Ils 18 d'avrigl 2002 ha il chor da la scola chantunala pudì preschentar a Zlin en Tschechia ses program da quest onn ad in public da premiera. Il program sa cumpona d'extracts da la Festa da Chalavaina dad Otto Barblan e dal "Gloria" da Francis Poulenc. Ils bunamain 90 chantadurs e chantaduras dal chor da la scola chantunala sut la direcziun da Christian Klucker da Tumein èn partids ina emna ordavant per la Tschechia. Là han els fatg ina visita a "lur" orchester.

En revantscha vegn l'orchester professiunal da passa 50 commembers a vegnir a Cuira. Ils 5 e 6 da matg sa preschentan il chor da la scola chantunala e la filarmonia Bohuslav Martinu en la baselgia S. Martin a Cuira. Ils musicists vegnan ad esser alloschads tar commembers dal chor.
Il "viadi" dal chor da la scola chantunala dueva dar la pussaivladad a tut las chantaduras ed a tut ils chantadurs ultra da prestar lavur musicala era d'emprender d'enconuscher in pau la cultura tscheca ed ils abitants da Zlin. Tranter auter èn vegnidas fatgas excursiuns e scuntradas cun scolars e students da Zlin. En quest inscunter cun ina cultura estra han las chantaduras ed ils chantadurs emprais che quai ch'è evident per nus è savens anc insatge spezial en la Tschechia, e quai era 13 onns suenter che la tenda da fier è crudada. Uschia han per exempel mussà ils responsabels d'in gimnasi cun luschezza lur installaziun moderna che fascheva dentant a nus Svizzers l'impressiun d'esser detg decadenta. La halla da gimnastica aveva in funs da parchet, las plazzas da gieu externas eran asfaltadas. A var 450 scolars stat a disposiziun mo ina suletta stanza da musica. Er l'alloschament, en il qual il chor era collocà fascheva ina buna parita sin il prospect, cun bogn ed implant da minigolf. Ma en detagl han ins vis spert ch'il stabiliment che vegn manà oz da persunas privatas avess grond basegn da vegnir sanà. Ma ni ils scolars ed ils magisters tschecs, ni ils manaders da l'alloschament parevan malcuntents cun lur infrastructura. Plitost avain nus "dal vest" stuì chapir che schebain che l'infrastructura funcziunescha bain en Svizra, n'èn ils Svizzers betg pli cuntents pervia da quai.
L'inscunter cun ils abitants da Zlin ha mussà che la lingua da la musica è internaziunala. La gruppa vocala da Zlin ha survegnì in grond applaus da las Grischunas e dals Grischuns. La medema gruppa vocala n'ha silsuenter betg manchentà l'occasiun da vegnir al concert dal chor da la scola chantunala. La finamira principala dal viadi è vegnida cuntanschida cleramain: malgrà la barriera linguistica èn daventads il chor e l'orchester ina unitad armoniusa e la chanzun rumantscha "A Trun sut igl ischi" ha intgantà.
Il chor da la scola chantunala sa preschenta quest onn cun las sequentas ovras: "Gloria" dal Franzos Francis Poulenc per sopran, chor ed orchester - sco solista ha pudì vegnir engaschada la Grischuna Judit Scherrer-Kleber - e cun extracts da la Festa da Chalavaina dal Grischun Otto Barblan. Per far ina reverenza a sia patria tscheca preschenta l'orchester la poesia sinfonica dad Antonin Dvorak "Die Mittagshexe".
Il chor da la scola chantunala cumpiglia quest onn var 80 scolaras e scolars e 10 magistras e magisters. Il chor vegn dirigì da Christian Klucker ch'è magister da musica a la scola chantunala grischuna. Tut ils participants coopereschan facultativamain als projects dal chor.
Per ils concerts dal chor da la scola chantunala ensemen cun la filarmonia Bohuslav Martinu è vegnida organisada ina prevendita. Ins po retrair ils bigliets al pretsch da 15, 25 e 35 francs tar il servetsch da clientella dal Globus (081-245 78 26). Ils concerts han lieu dumengia, ils 5 da matg e glindesdi, ils 6 da matg a las 20.15 en la baselgia S. Martin a Cuira.

Gremi: departament d'educaziun, cultura e protecziun da l'ambient
Funtauna: rg scola chantunala grischuna