Mardi, ils 7 da matg 2002 ha lieu en il museum grischun da la natira in sairada en il rom da l'exposiziun "Kleine Kinder - Lust und Last". Pledentads èn: babs, mammas, spezialistas e spezialists ed autras persunas che reflecteschan e vulan sviluppar vinavant la paternitad.

L'occurrenza vegn organisada dal post da stab per dumondas d'egualitad dal Grischun ed ha lieu en il rom ed en las localitads da l'exposiziun "Kleine Kinder - Lust und Last" en il museum grischun da la natira a la Masanserstrasse 31 a Cuira. L'occurrenza entschaiva a las 20.15. Sin il program stattan in gir tras l'exposiziun, infurmaziuns davart il tema ed a la fin ina discussiun.

Ils babs èn en moda
"La sensibilitad dal bab da far termagls cun ils uffants correlescha fitg ferm ed evidentamain il cumportament d'attaschadad dals uffants en la vegliadetgna da 16 fin 22 onns." Quai è il resultat surprendent da la perscrutaziun dals babs che vegn puspè en moda. Er ils babs sezs èn en moda, schebain er a moda main marcanta ch'ils resultats da questa perscrutaziun ch'èn vegnids publitgads avant intgin temp en la revista Geo. Ils babs vegnan pli activs. Stuschar la charrotscha d'uffants n'è betg pli penibel, mabain plitost collià cun ina presa luschezza. Motivs famigliars e termins che na permettan betg da restar pli ditg oz e che na permettan betg da prender part ad ina sesida la saira mintgatant perquai ch'ins ha d'avair quità dals uffants dastgan ins exprimer er en il mund da professiun. U forsa tuttina betg?
Èsi gist sco quai che Stefan Binkert (Berna) analisescha en sia retschertga ch'ils babs vegnian restrenschids fitg en la pussaivladads d'avair contact cun ils uffants savens en ina fasa tempriva ed impurtanta da la paternitad entras il sistem medicinal e la mancanza d'in congedi da paternitad? U èsi forsa vair quai che l'acziun "fairplay at home" sugerescha, numnadamain che la gronda part dals babs na veglian betg sa participar pli fitg? U poi esser da grond'impurtanza che las mammas stoppian ceder in tschert sectur da lur pussanza, sch'ils babs duain esser pli preschents en la tgira dals uffants ed en l'educaziun dals uffants?
Tut questas dumondas pon vegnir discutadas a chaschun da la discussiun. La discussiun è previsa per babs, mammas, spezialistas e spezialists ed autras persunas che reflecteschan e vulan sviluppar vinavant la paternitad.
Ils problems davart igl esser bab èn sulettamain ina part da l'occurenza. Paternitad è ina dira nusch manegian Andreas Borter da Burgdorf e Christof Arn da Scharàns che vegnan a realisar l'occurrenza sco babs e spezialistas e spezialists. In gir communabel tras l'exposiziun "Kleine Kinder - Lust und Last" è previs a l'entschatta da l'occurrenza. I suondan insaquants inputs infurmativs. La discussiun tracta la dumonda: tgi po far insatge? Pon ins far insatge cun plazzas parzialas, pon las mammas, ils posts spezialisads, ils babs, las pajas da las dunnas, las medias, la politica u ... far insatge? Perquai ch'i n'è probablamain betg pussaivel da chattar ina suletta resposta gista, vegni a dar blers impuls e bleras respostas pussaivlas a chaschun da quest'occurrenza.

Gremi: post da stab per dumondas d'egualitad dal Grischun
Funtauna: rg post da stab per dumondas d'egualitad dal Grischun