La lescha davart l'organisaziun dals servetschs psichiatrics è en vigur dapli l'entschatta da quest onn. Ussa ha la regenza grischuna approvà il mandat da prestaziun correspundent per ils servetschs psichiatrics dal Grischun. La finamira dal mandat da prestaziun è quella da coordinar e d'optimar la purschida da prestaziuns.

Ils servetschs psichiatrics dal Grischun mainan las clinicas Beverin e Waldhaus sco er ils centers da dimora Montalin, Rothenbrunnen ed Arche Nova. Persunas creschidas cun malsognas psichicas pon sa laschar tractar en quests uschenumnads "centers da cumpetenza per il provediment central psichiatric en il chantun Grischun"; il tractament po esser staziunar, parzialmain staziunar u ambulant. Sco secturs centrals en il senn dal mandat da prestaziun valan la psichiatria acuta, la gerontopsichiatria (psichiatria per persunas attempadas) e la psichiatria da reabilitaziun; ina partiziun da terapia per toxicomans ed ina partiziun da psicoterapia cumpletteschan la purschida da prestaziuns da las duas clinicas.

Secturs spezials be en ina clinica
Secturs spezials vegnan purschids per l'entir chantun be anc en ina da las duas clinicas, e quai en la furma dals uschenumnads "secturs spezialisads" che cumpiglian il servetsch medicinal-terapeutic, il servetsch psicologic, il servetsch social, la pastoraziun, l'apoteca ed in labor, sco er ils "secturs da support" che cumpiglian la direcziun, l'administraziun, l'informatica, l'economia da chasa, la cuschina/alimentaziun ed il servetsch tecnic.
Il mandat da prestaziun cumpiglia er la cumponenta da la furmaziun, dal perfecziunament e da la furmaziun supplementara. Ils servetschs psichiatrics dal Grischun èn pia obligads da metter a disposiziun plazzas per la furmaziun supplementara per medias e medis assistents, per professiuns da la tgira da la sanadad e la tgira da malsauns, per autras professiuns dal sectur da sanadad sco er per professiuns da pedagogia sociala. En il rom da las pussaivladads organisatorias e persunalas da domaduas clinicas duain els ultra da quai porscher plazzas da praticum a las scolas grischunas per la tgira da la sanadad e la tgira da malsauns.

Mandat da prestaziun per differentas purschidas
Il mandat da prestaziun sa divida en trais secturs. L'emprim sectur cumpiglia il mandat da prestaziun per il provediment psichiatric da persunas creschidas; il segund sectur quel per ils centers da dimora ed ils lavuratoris d'occupaziun per umans cun impediments psichics (chasa da dimora Montalin, gruppa d'abitar Casanna, chasa da dimora Giuvaulta, center da di El Butt, Roveredo e gruppa d'abitar Sunnastube, Pasqual); il terz sectur quel per il center cun occupaziun integrada per persunas impedidas da spiert (center da dimora Arche Nova, Landquart, gruppa d'abitar Igis, gruppa d'abitar Vaz sut e gruppa d'abitar Schiers).

Contribuziuns chantunalas a differentas instituziuns
La ARGO fundaziun center grischun per lavuratoris e dimoras d'impedids ha piglià a fit l'onn 1998 in edifizi nov a Casti. La regenza grischuna ha uss concedì ina contribuziun da maximalmain 1,905 francs a la ARGO per cumprar l'immobiglia.
Premissa per la contribuziun chantunala è la garanzia da l'ulteriura finanziaziun sco er l'approvaziun e la subvenziun da quest project da cumpra tras la confederaziun.

Vischnancas e regiuns
Stemprads, inveteraziun e regiuvinament insufficient èn ils motivs ch'il guaud da Tavau na po en tscherts lieus betg pli garantir sia funcziun da protecziun. Il project integral "Davos 2002" cumpiglia mesiras per reconstruir la funcziun da protecziun dal guaud e medemamain per realisar las lavurs necessarias en il sectur da las averturas, dal lavuratori forestal e dals rempars entaifer ils proxims tschintg onns. La regenza grischuna approva il project e garantescha ina contribuziun chantunala da maximalmain 1,449 milliuns francs.
La regenza grischuna approva la revisiun parziala da la lescha da taglia da las vischnanca da Trimmis sco er la revisiun parziala da la planisaziun locala da las vischnancas da Tusaun (plan da zonas Pantun), Jenins (plan da zonas parzial engrondiment zona da parcar "Chrüzli"), Castrisch (revisiun parziala plan da zonas Casura, revisiun parziala plan general d'avertura Casura), e da la vischnanca da Favugn (revisiun da la lescha da construcziun, midadas plan da zonas e plan general da furmaziun, midadas plan da vias); ultra da quai approva la regenza grischuna er ina revisiun da la lescha da construcziun da la vischnanca da Fanas.
La regenza grischuna approva credits en l'import total da circa quatter milliuns francs per differents projects da construcziun da vias.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun