Sut il presidi da deputada Ursina Valsecchi, Flearda, ed en
preschientscha da cusseglier guvernativ Claudio Lardi ha tractà ina
cumissiun predeliberanta dal cussegl grond la missiva ed il sboz per ina
nova lescha davart las scolas da sanadad e per il champ social (...). La
cumissiun propona unanimamain al cussegl grond d'entrar sin la proposta
e d'approvar la lescha cun las midadas proponidas per mauns da la
votaziun dal pievel.
La cumissiun predeliberanta giuditgescha la proposta da la lescha
sco pass impurtant per la scolaziun en il sectur da sanadad ed en il
sectur social ch'augmenta la percepziun e la renconuschientscha dal
persunal da la professiun pertutgada. La lescha permetta da realisar cun
success las novaziuns che sa mussan sin plaun federal e da diriger e
coordinar las purschidas da scolaziun en il chantun Grischun.
En il center da la proposta stat la realisaziun dal "center da
furmaziun da sanadad e dal champ social" a Cuira. Quel duai reunir sut
in tetg la scolaziun da la scola professiunala da sanadad e tgira da
malsauns (SPS&T), la scola interconfessiunala da sanadad e tgira da
malsauns dal Grischun (SIT), la scola grischuna da tgira psichiatrica da
malsauns e las partiziuns betg seminaristicas da la scola da dunnas dal
Grischun. Per il center da furmaziun da sanadad e dal champ social è
previs in stabiliment nov. La cumissiun predeliberanta sustegna la
concepziun d'in center da furmaziun sco institut independent. Ella è
s'occupada pli profundamain da la dumonda co che las disposiziuns da la
lescha pertutgant il persunal sajan da chapir suenter ch'il tribunal
federal ha prendì il mars 2002 ina decisiun cun rinviaments impurtants
pertutgant la concepziun d'ina tala regulaziun. Plinavant resguarda la
lescha nova er ils interess da las scolas cun purtaders betg statals,
per las qualas igl èn previsas contribuziuns dal chantun.
Il cussegl grond vegn a s'occupar a chaschun da la sessiun da matg
2002 dal project.
gremi: cumissiun predeliberanta scola da sanadad e per il champ
social
funtauna: rg cumissiun predeliberanta scola da sanadad e per il
champ social