"In the Spirit of Davos" è vegnida fundada oz. La fundaziun che vegn
purtada da la confederaziun, dal chantun Grischun e dal circul e da la
vischnanca da Tavau ha in chapital da fundaziun da 300'000 francs e vul
promover il dialog avert davart las tematicas globalas.
La fundaziun "In the Spirit of Davos" ch'è vegnida creada da Claudio
Lardi, president da la regenza, Hans Peter Michel, administratur dal
circul da Tavau e da David Syz, secretari da stadi per economia (seco)
en la chasa-cumin da Tavau vul porscher ina plattafurma per in dialog
avert e constructiv davart las consequenzas da la globalisaziun
creschenta. Sa participar a quest dialog duain represchentants da la
societad civila, da la politica, da l'economia e da la scienza. La
fundaziun po confinanziar projects en connex cun tematicas globalas che
vegnan inoltradas d'organisaziuns na-guvernamentalas (NGO) e da
persunalitads.
Sponsoring, contribuziuns da fautur e daners publics
Il chapital da fundaziun da "In the Spirit of Davos" en l'autezza da
300'000 francs ch'è vegnì pajà dals trais purtaders confederaziun,
chantun Grischun e dal circul e da la vischnanca da Tavau duai vegnir
cumplettà cun contribuziuns da sponsoring e da fautur sco er cun
ulteriurs meds dal maun public.
Durant las proximas emnas duai vegnir chattada ina persuna adattada
per la direcziun da la fundaziun. Plinavant planisescha il cussegl da
fundaziun che consista dals dus ambassadurs Jörg Al. Reding, secretariat
da stadi da l'economia (seco) e Peter Maurer dal departament federal
dals affars exteriurs (DFAE, partiziun dals dretgs umans e da la
politica umanitara), dals represchentants dal chantun Grischun,
cusseglier guvernativ Klaus Huber e deputà Johannes Pfenninger sco er
dals dus commembers dal cussegl cirquital dal circul e da la vischnanca
da Tavau Maria von Ballmoos e Thomas Spielmann, d'instituir in cussegl
consultativ per "In the Spirit of Davos" che duai sustegnair la lavur da
la fundaziun.
Gremi: departament da l'intern e da l'economia publica
Funtauna: rg departament da l'intern e da l'economia publica