Pertge datti be paucas dunnas en las vischnancas grischunas che s'occupan da la politica? La resposta a questa dumonda vul chattar il project "Meta" dal post chantunal per dumondas d'egualitad. Las quatter vischnancas participadas Domat, Schnaus, Vaz e Vella èn sa decleradas prontas da far part da quest studi ch'è singular per la Svizra. Tut las dunnas cun dretg da vuschar vegnan a pudair respunder las pli differentas dumondas concernent lur interess ed experientschas sco er ad externar atgnas ideas concernent la vita (politica) en lur vischnanca.
La direcziun dal project dependa dal fatg che uschè bleras dunnas sco pussaivel empleneschian il questiunari - gist er talas che n'han da far nagut cun la politica. Ils motivs per la situaziun actuala èn fin uss perscrutads be rudimentarmain. Perquai infurmeschan ins ordavant en las vischnancas via publicaziuns communalas, ma er via differentas medias u cun l'agid d'uniuns; las abitantas vegnan supplitgadas da sa participar a la retschertga. Ils resultats dal studi vegnan a mussar nua ch'ins sto entschaiver a prender mesiras per augmentar la participaziun da las dunnas a la politica. La spediziun dals questiunaris succeda suenter Tschuncaisma. Ils resultats dal studi vegnan publitgads l'onn 2003 en il rom dal giubileum dal chantun Grischun.

Gremi: post per dumondas d'egualitad
Funtauna: rg post per dumondas d'egualitad