Il favrer 2003 ha lieu il campiunadi mundial da skis alpin a San Murezzan. La federaziun internaziunala da skis (FIS) prevesa a chaschun da questas occurenzas mesiras accumpagnantas en ils secturs da cultura e giuventetgna. Giuvenils da tut ils pajais commembers da la FIS duain vegnir envidads ed avair la pussaivladad d'assister a las concurrenzas e da qua tras sentir l'atmosfera, da sa participar a las occurrenzas generalas e d'emprender d'enconuscher la Svizra, il chantun Grischun e l'Engiadina. La regenza conceda a la FIS ina contribuziun da 20'000 francs per la realisaziun d'in camp da giuvenils a chaschun dals campiunadis mundials da skis 2003.

L'iniziativa per l'egualitad da schanzas per ils giuvenils grischuns è reussida
L'iniziativa dal pievel "per mantegnair l'egualitad da schanzas per ils giuvenils grischuns" (revisiun parziala da la lescha davart las scolas popularas dal chantun Grischun) ch'è vegnida inoltrada mez december 2001 è reussida cun 3'643 suttascripziuns valaivlas. L'iniziativa dal pievel pretenda duas chaussas: il concept da lingua al stgalim superiur da la scola publica saja da midar e la cumpetenza da fixar ils roms saja da retrair dal cussegl grond e da delegar al pievel.

Fusiun da circuls da stadi civil
Ils uffizis da stadi civil d'Avras, Valragn, Medel (Valragn), Nufenen, Spleia e Sur (Valragn) s'uneschan a l'uffizi da stadi civil da Avras-Valragn cun sedia a Nufenen. La fusiun cuntanscha vigur legala enfin il pli tard la fin da schaner.
Ils uffizis da stadi civil d'Ardez, Ftan, Guarda, Lavin, Ramosch, Samignun, Scuol, Sent, Susch, Tarasp, Tschlin e Zernez vegnan unids al "Uffizi da stadi civil Engiadina Bassa-Samignun / Zivilstands-Amt Unterengadin-Samnaun" cun sedia a Ramosch. La fusiun cuntanscha vigur legala enfin il pli tard la fin da mars.
Ils uffizis da stadi civil da Fuldera-Lü, Müstair, Sta. Maria V.M., Tschierv e Valchava vegnan unids a l'uffizi da stadi civil Val Müstair cun sedia a Müstair. La fusiun cuntanscha vigur legala enfin il pli tard la fin d'avrigl.

Da las vischnancas
La constituziun da la vischnanca da Suraua ch'è resortida da la fusiun da las vischnancas da Camuns, Surcasti, Tersnaus ed Uors-Peiden vegn approvada. Ella entra en vigur retroactivamain l'entschatta da schaner 2002.

Fatgs dal persunal
Roger Bertogg, naschius 1972, da Sevgein, domicilià a Glion, daventa geo-informaticher/manader da partiziun tar l'uffizi da planisaziun. El entra en uffizi il cumenzament d'avrigl.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun