Sut il presidi da deputada Vroni Christ, Tavau Vitg, ed en preschientscha dal president da la regenza Claudio Lardi ha tractà ina cumissiun predeliberanta dal cussegl grond la missiva per la construcziun nova d'ina mediateca per la scol'auta professiunala da pedagogia a Cuira. La cumissiun propona unanimamain al cussegl grond d'entrar sin la proposta e da rinviar la fatschenta a la regenza e quai per realisar in provisorium per la mediateca da la scol'auta professiunala da pedagogia.
La cumissiun affirmescha unanimamain la necessitad d'ina mediateca per la scol'auta professiunala da pedagogia. Ella s'exprima en quest senn da metter a disposiziun gia per il cumenzament da l'onn da scola 2002/03 in provisorium per ina mediateca. Questa schliaziun na mainia betg be a la situaziun che la mediateca saja pronta in onn pli baud che cun il bajetg nov planisà. Ella pussibilitescha er ina planisaziun generala per l'entir areal dal Kantengut, cun la quala ils basegns da la mediateca da la scol'auta professiunala da pedagogia e dal center da furmaziun da sanadad e per il champ social vegnan satisfatgs cun ina suletta mediateca ch'è concepida per domaduas scolas. Qua tras pon er vegnir optimads ils custs da manaschi.
Il cussegl grond vegn a s'occupar a chaschun da la sessiun da matg 2002 dal project.

gremi: cumissiun predeliberanta dal cussegl grond
funtauna: rg cumissiun predeliberanta dal cussegl grond