Willi Benz, il schef da l'administraziun chantunala da finanzas va
en pensiun la fin da matg 2002. El guarda enavos sin ina ritga vita
professiunala.
Suenter il temp da scola en il chantun da Son Gagl ha el absolvì ina
scolaziun da commerzi. L'emprim ha el lavurà sin il champ fiduziari, pli
tard sco contabilist principal en in manaschi da producziun.
L'entschatta dals onns 70 ha el surpiglià ina plazza en il Grischun
sco revisur tar l'inspecturat da vischnancas. En questa funcziun è el
s'occupà a moda intensiva dals problems da las vischnancas ed ha emprais
d'enconuscher fitg bain il pajais e la glieud en ses numerus contacts.
La lavur da revisur sa splegava lezza giada anc in pau auter ch'oz. En
vischnancas pli pitschnas registrava il cassier communal ils pajaments e
las facturaziuns anc a maun en differents cudeschs. Qua devi in cudesch
da cassa, in cudesch dal conto current, in cudesch da las taglias
e.u.v., tuts en differentas grondezzas e furmas. Ils cassiers da questas
vischnancas pitschnas lavuravan savens en l'agricultura u en l'industria
ed ademplivan lur uffizi il pli a chasa. La revisiun da quints vegniva
pia er fatga en numerus cas en la stiva empernaivla.
1982 ha Willi Benz surpiglià la direcziun per chaussas penalas
economicas tar la polizia chantunala. El è s'occupà en emprima lingia da
denunzias penalas pervia da sfalsificaziuns da documents, defraudaziun
ed autras acziuns fraudulentas. Ses scleriments da la polizia èn
succedids en stretga collavuraziun cun la procura publica, cun las
autoritads federalas e cun auters uffizis da la polizia svizzers ed
esters.
1988 ha el midà en l'uffizi chantunal da contabilitad da lezza giada
- l'actuala administraziun da finanzas -, da la quala el è daventà
schef. Da las incumbensas principalas da quest uffizi fan part l'incasso
da las pretensiuns dal chantun, il servetsch central da pajament,
l'administraziun dals meds liquids sco er l'administraziun da las
vaglias e dals daivets dal chantun. Las experientschas da la lavur en
l'inspecturat da vischnancas han gidà Willi Benz en questa nova
funcziun.
Durant sia perioda d'uffizi èn vegnidas surdadas a ses uffizi
successivamain ulteriuras incumbensas. Dapi 1999 è el cumpetent per
l'entira preparaziun dal preventiv chantunal. Oz è el responsabel per
ina gronda part da las finanzas chantunalas.
Ultra da la liquidaziun da las fatschentas regularas dal di, è Willi
Benz s'occupà ils davos onns pli e pli da projects da la EED. Qua èsi da
menziunar spezialmain la substituziun dals programs da contabilitad
finanziala antiquads en vista a la midada dal millenni. Il nov sistem da
EED ha pudì vegnir mess en funcziun tenor plan il 1. da schaner 1998, e
quai suenter ch'ha gì lieu ina lunga consultaziun preliminara en ina
gruppa da lavur sut sia direcziun.
En tut sias activitads professiunalas ed en tut ses projects stava a
Willi Benz fitg a cor ina collavuraziun armonica surtut cun sias
collavuraturas e ses collavuraturs. Conflicts u schizunt dispitas eran
adina in'orrur per el. Quai na vul dentant insumma betg dir ch'el
n'avess betg exprimì cleramain sia opiniun. Sch'el era persvadì d'ina
chaussa, stava el bun per quella e defendeva era cleramain sia opiniun.
Per el era la lavur exacta, la fidaivladad e la punctualitad in duair.
Il medem spetgava el da tut quels, cun ils quals el collavurava,
spezialmain dentant da sias collavuraturas e da ses collavuraturs.
Tuttina, u plitost gist per quai han quels apprezià el zunt fitg sco
schef e collavurà fitg gugent cun el. Els savevan ch'els pudevan sa
fidar dad el.
Willi Benz è cun dretg losch da pudair surdar a ses successur in
team qualifitgà professiunalmain, in team che funcziunescha bain e da
pudair surdar in uffizi, en il qual dus secturs impurtants vegnan manads
cun success da dunnas.
Igl è stà in giavisch da Willi Benz da na betg negliger la cumpagnia
malgrà la blera lavur. Sch'igl era pussaivel è el adina sa participà a
las occurrenzas dal departament ed ha giudì las gitas u ils dis da skis.
Suenter la pensiun ha el uss puspè dapli temp per turas en muntogna e
marschs sur lungas distanzas. Igl è da giavischar da cor ad el ch'el
possia giudair plainamain la terza part da la vita, ensemen cun sia
consorta e cun sia famiglia. Ed igl è da sperar che tar tut ses numerus
plans na vegnian betg a la curta ses iert, ses culm ed il far musica.
Jau engraziel Willi Benz cordialmain per sia fidaivladad da plirs
onns envers noss chantun, per ses grond engaschament, ses engaschi
exemplar er en favur da sias collavuraturas e da ses collavuraturs, per
la collavuraziun constructiva, per sia avertadad e loialitad.
Cussegliera guvernativa dr. E. Widmer-Schlumpf
Gremi: departament da finanzas e militar
Funtauna: rg departament da finanzas e militar