Ils 28 da matg 2001 - pia avant circa in onn - ha cumenzà l'exposiziun publica dal sboz per il plan directiv. Al medem temp èn succedidas l'examinaziun preliminara dal sboz per il plan directiv tras la confederaziun e la consultaziun tar ils vischins. Co èsi ussa cun las lavurs vi da quest instrument il pli impurtant da la planisaziun chantunala e co vai vinavant?

L'exposiziun è vegnida fatga a moda decentrala, en collavuraziun cun las regiuns ed ha durà dus mais. Igl èn vegnidas organisadas ca. 60 occurrenzas d'infurmaziun ed uras da consultaziun en las regiuns ed en las singulas vischnancas. En tut èn vegnidas inoltradas ca. 3'700 propostas, circa la mesadad eran identicas. Anc ina giada la mesadad da questas propostas sa referescha sin ina fixaziun da spazi concreta (p.ex. engrondiment da la zona da recreaziun intensiva, territori sut protecziun da la natira, zona d'explotaziun). Tschellas dumondas reguardan las finamiras e ponderaziuns formuladas en il plan directiv. Gia la fin d'october è arrivà il rapport da l'examinaziun preliminara da la confederaziun. Durant la procedura d'exposiziun è ultra da quai vegnida inoltrada a la regenza ina petiziun da las organisaziuns per la protecziun da l'ambient.
La fin d'october 2001 è vegnida fatga la davosa consultaziun. Da las singulas propostas inoltradas e lur motivaziuns pon ins prender invista sut www.richtplan.gr.ch.. A chaschun d'ina conferenza la fin da november 2001 è vegnida preschentada la diversitad d'opiniuns davart il plan directiv ad in public pli vast ed a las medias.

Tge èsi capità cun las objecziuns?
Las objecziuns èn vegnidas analisadas e sortidas tenor lur impurtanza dal spazi e lur stgalim da giustificaziun. Sin il stgalim ‚planisaziun locala' vegnan elavuradas vinavant objecziuns fitg deta-
gliadas (p.ex. schlargiaments da zonas da construcziun, spustaments da cunfins sin pitschen spazi). Sin la pluna 'planisaziun regiunala' vegnan las objecziuns d'impurtanza regiunala (p.ex. novas ideas d'utilisaziun per il turissem d'enviern, parairis en connex cun golf, explotaziun da material e deponias). Propostas che pertutgan la planisaziun da la confederaziun (p.ex. infrastructura aviatica) vegnan elavuradas vinavant sin quest stgalim. Propostas che stattan en connex cun las finamiras e las ponderaziuns directivas davart la politica da planisaziun en general u che mettan da princip en dubi objects fixads en il spazi vegnan elavuradas directamain en il plan directiv chantunal. Tar l'elavuraziun da las propostas èsi spezialmain interessant da vesair sch'i vegnan purtads novs arguments u novas enconuschientschas.

La repassada dal sboz per il plan directiv va en plaina forza
La repassada dal sboz per il plan directiv suonda entaifer ils posts d'administraziun ed en collavuraziun cun las regiuns. Quai spezialmain per dus motivs: las regiuns han elavurà cun ils plans directivs regiunals impurtants elements constitutivs dal plan directiv chantunal; grazia a la collavuraziun cun exponer ils plans han ellas la survista da las objecziuns inoltradas ed enconuschan ils interess da las vischnancas. Fin la fin da matg 2002 èn vegnidas fatgas las dietas da lavur en diesch regiuns. En las ulteriuras tschintg regiuns èn planisads workshops avant las vacanzas da stad. Sco basa per questas dietas vala l'examinaziun preliminara da la confederaziun e la posiziun da las regiuns sco er l'opiniun dals vischins. A maun da questa basa vegnan discutadas sistematicamain las opiniuns differentas e congruentas. I vegn lura decidì communablamain co che la repassada duai succeder.

L'avegnir dal plan directiv predominescha
Er suenter la finiziun dal plan directiv chantunal va la planisaziun regiunala vinavant. L'orientaziun futura da la planisaziun regiunala ed ils secturs da responsabladad da l'avegnir vegnan discutads en dietas da lavur. En quellas vegnan tractadas las differentas propostas tenor las regiuns. Igl è cler ch'en Bregaglia han autras dumondas prioritad che en la Val dal Rain. La concepziun concreta da la planisaziun regiunala futura p. ex. areguard ils cuntegns tematics vegn sviluppada vinavant en quests workshops.

Naginas respostas directas a las objecziuns
Il plan directiv porscha ina vista generala. El serva a la coordinaziun ed è impegnativ per las autoritads. El n'è ni sever concernent las parcellas ni impegnativ per ils proprietaris da terren. La lescha na prevesa betg da respunder mintga singula objecziun.Tegnend quint da la pluna da propostas inoltradas na fiss quai gnanc pussaivel. Percunter èsi previs da far ina resumaziun da las propostas che na vegnan betg resguardadas e da preschentar quella tar il conclus da la regenza. Ultra da quai pon ins guardar suenter il conclus en l'internet co che las propostas èn vegnidas tractadas.

Il conclus davart plan directiv vegn tratg anc quest onn
La metoda elegida per repassar il sboz dal plan directiv vul promover la chapientscha tranter ils purtaders da la planisaziun e cuntanscher in'auta accordanza dal plan tranter las vischnancas, las regiuns ed il chantun. Igl è planisà da repassar la part concepziunala dal plan directiv fin las vacanzas da stad. Durant la stad èsi previs da repassar las glistas dals objects. Cun questas limitas temporalas po - sco previs en l'incarica dal project - la regenza decider anc quest onn davart il plan directiv. Suenter suonda l'approvaziun da la confederaziun.

Gremi: Departement da l'intern e da l'economia publica
Funtauna: rg uffizi da planisaziun