La fin da matg va en pensiun dr. Ruedi Schäfli, schef da l'uffizi per economia e turissem. Sias activitads professiunalas eran en emprima lingia en l'interess dal Grischun sco lieu economic.

Suenter avair terminà il studi ha lavurà dr. Ruedi Schäfli sco assistent a l'institut svizzer per la perscrutaziun da l'economia da l'exteriur, da las structuras e dal martgà a la scol'auta da Son Gagl. Questa lavur d'assistent ha el terminà cun ina dissertaziun davart las relaziuns intercommunalas en aglomeraziuns urbanas, resguardond spezialmain las vischnancas da Son Gagl e da Gaiserwald.

L'entschatta dals onns 70 è el s'occupà en il chantun Grischun da l'elavuraziun da la part economica dals concepts da svilup regiunals Mantogna-Tumleastga, Valragn-Engiadina bassa e Val Müstair-Regione Valle di Poschiavo. L'onn 1978 ha el acceptà en il Grischun la plazza d'in delegà per dumondas d'ospitals e da chasas tar il departament da sanitad.

1980 ha la regenza elegì dr. Ruedi Schäfli sco delegà per dumondas da la promoziun da l'economia en il departament da l'intern e da l'economia publica. Questa fucziun ha el ademplì durant otg onns.

En connex cun la fusiun succedida l'onn 1988 da l'uffizi d'industria, mastergn e lavur cun la promoziun da l'economia e cun ils fatgs da magisters da skis e da guidas da muntogna sco er cun ils fatgs d'ustaria ha dr. Ruedi Schäfli fatg midada en il nov uffizi per economia e turissem, dal qual el è daventà schef. Sut sia direcziun èn vegnids resumads l'onn 1990 ad in decret la lescha davart il traffic d'esters e la lescha per promover l'economia. Dr. Ruedi Schäfli ha manà numerusas gruppas da lavur impurtantas, sco p.ex. quella per ils indrizs da far naiv, ha dà impuls a la politica d'energia ed ha cooperà en la cumissiun economica da la ARGE Alp. Per indesch onns è el stà il president da la cumissiun chantunala d'examinaziun per ils fatgs d'ustaria.

Durant sia perioda d'uffizi ha ses servetsch obtegnì ulteriuras incumbensas, ha dentant er surdà incumbensas ad auters servetschs. Dapi la midada da la lescha federala davart agids d'investiziun è ses servetsch responsabel per la coordinaziun e per l'adempliment d'ulteriuras incumbensas impurtantas per la politica regiunala. L'onn 1996 han ins dividì las duas partiziuns da l'uffizi per economia e turissem en dus servetschs, numnadamain l'uffizi d'industria, mastergn e lavur e l'uffizi per economia e turissem. Dapi la revisiun da la lescha chantunala d'ustaria l'onn 1999 èn vegnidas surdadas las incumbensas dal chantun en connex cun il commerzi en detagl da bavrondas destilladas novamain al departament da l'intern e da l'economia publica ed assegnadas là a l'uffizi per economia e turissem.

Dr. Ruedi Schäfli banduna ses uffizi savend ch'el ha furnì prestaziuns professiunalmain cumpetentas en favur da l'economia grischuna e ch'el po surdar in bun team spezialisà a ses successur.

Jau engraziel dr. Ruedi Schäfli er en num da la regenza cordialmain per sia lavur engaschada e per la buna collavuraziun ch'era adina confidenta e constructiva. Per sia terza fasa da la vita vi jau exprimer ils megliers giavischs e sperar ch'el possia giudair quella ensemen cun sia dunna e cun sia famiglia.

Klaus Huber, cusseglier guvernativ

Gremi: departament da l'intern e da l'economia publica dal Grischun
Funtauna: rg departament da l'intern e da l'economia publica dal Grischun