A l'aperitiv d'energia da mesemna proxima preschenta l'uffizi
d'energia dal Grischun edifizis exemplars dal punct da vista energetic.
Ils edifizis sa distinguan areguard il diever, l'architectura ed il
concept da construcziun. Tut las chasas demussan in consum d'energia
minimal ed in aut confort. Las prescripziuns da qualitad ed energeticas
tenor il standard da minergia u da chasa passiva vegnan ademplidas en
tut las chasas.
L'architect Andri Schlegel mussa sia chasa d'ina famiglia a Malix
ch'ha obtegnì in certificat da minergia. Ils elements da furmaziun
consistan da betun, fier e vaider. La chasa sin la spunda taissa derasa
forza ed è francada sco corp massiv. L'effect è quel d'in spelm en la
natira.
La chasa na basegna betg in stgaudament central. Ina pitschna pigna
da lain tanscha. Il consum annual munta a be 500 kg pellet. La
preparaziun da l'aua chauda succeda tras collecturs solars. L'aria
chauda vegn manada en chasa tras ina ventilaziun e dovra gist uschè
blera energia sco in pairin da 25 Watt. La chasa è fitg bain protegida
d'ina isolaziun da fin a 25 cm ed è munida cun grondas fanestras.
Design e lifestyle
L'hotel da design "Riders Palace II" metta l'accent sin
l'architectura, il design ed il lifestyle. Tenor l'architect René
Meierhofer è la construcziun nova la cuntinuaziun consequenta d'ina
strategia instradada gia a la fin dals onns otganta da las pendicularas
Laax da lezza giada per augmentar l'attractivitad. Las muntognas, la
naiv ed ils runals na tanschan betg pli per carmalar in public giuven e
trendig. Dumandà è lifestyle. Betg mo ils indrizs tecnics progressivs,
mabain era il tegnairchasa d'energia bain ponderà e la concepziun da la
glisch raffinada ensemen cun l'architectura cubica senza stortigls
appelleschan il public prendì en mira. L'hotel è gia recepì en il circul
dals emprims hotels da design dal mund ed ha obtegnì da l'uffizi
d'energia dal Grischun il certificat da minergia.
L'hotel ha ina isolaziun optimala per la chalur. La ventilaziun per
tut las chombras d'hotel è munida cun ina recuperaziun da la chalur.
L'energia da stgaudar vegn producida cun ina pumpa a chalur da l'aua dal
batschigl d'accumulaziun vischin (lai da gulivaziun) da l'ovra
electrica da Flem.
In basegn minimal d'energia
L'architect da Cuira Andrea Rüedi preschenta ina surfabricaziun cun
fitg bass consum d'energia a Stäfa. Cun questa surfabricaziun d'abitadi
vegn realisà per l'emprima giada en Svizra in concept d'ina chasa da
pliras famiglias cun fitg bass consum d'energia ad in fit-chasa ch'è anc
da pajar. Il project ha caracter da pionier. Las chasas porschan dapli
che mo in bass consum d'energia.
Il concept da construcziun cumplessiv resguarda ultra da las
pretensiuns da construcziun er quellas per dapli qualitad d'abitar e da
viver. Da quai fan part l'estetica, la tscherna da material da lunga
durada e quasi exclusivamain da construcziun biologica sco er in concept
d'energia bain ponderà.
Il sulegl è il stgaudament
Las chasas passivas utiliseschan en emprima lingia il sulegl sco
stgaudament. Quest concept dumonda paraids e mirs exteriurs optimals,
ina vitrificaziun generusa e suffizientamain massa d'accumulaziun a
l'intern per pudair accumular la chalur solara che resulta senza
surstgaudada dal local. Cun quest concept pon ins desister per gronda
part d'in stgaudament supplementar convenziunal.
L'uffizi d'energia dal Grischun ha interess da mussar a la
publicitad edifizis cun in bun concept d'energia. Quests edifizis duain
animar ils possessurs da chasas ed ils patruns da construcziun da
medemamain realisar buns edifizis dal punct da vista energetic. Per
quest motiv è vegnida engrondida la pagina d'internet www.energie.gr.ch
da l'uffizi cun la rubrica "Ils megliers edifizis". Quels edifizis
servan sco exempel. Andrea Lötscher (partizipaziun diever d'energia) dat
ina curta survista da quels en il rom da l'aperitiv dals 12 da
zercladur. L'aperitiv d'energia ha lieu a las 17.00 a la scol'auta da
tecnica ed economia a Cuira.
Gremi: uffizi d'energia dal Grischun
Funtauna: rg uffizi d'energia dal Grischun