LA REGENZA DELIBERESCHA LA LESCHA CHANTUNALA DAVART ILS SUPPLEMENTS DA FAMIGLIA
La regenza suttametta al parlament la nova lescha chantunala davart ils supplements da famiglia LSF. La nova regulaziun resguarda il maletg da famiglia modern e na premetta betg pli ina lavur a temp cumplain per pudair retrair ils entirs supplements d'uffants. Nov è er la cumpensaziun da las grevezzas tranter las cassas da famiglia.

Tgi ch'educhescha ozendi sulet e tgi che ha ina lavur regulara cun in pensum pli pitschen che 50 pertschient ha mo il dretg d'ina part dals supplements d'uffants; pèrs che vivan en in concubinat u famiglias cun figliastras e figliasters p.ex. na survegnan oz nagut. Da nov duain gia survegnir il supplement cumplain persunas cun ina lavur parziala da 20 pertschient. Dus u plirs pensums parzials da sut 20 pertschient dastgan vegnir quintads ensemen.

"A mintg'uffant in supplement" - per gronda part accumplì
Plinavant resguarda il nov project da lescha er las effectivas relaziuns famigliaras. Tut ils uffants, per il mantegniment da tals (tgira ed educaziun resp. pajaments) vegn procurà en ina "dimensiun considerabla", libereschan per las persuna cun la pussanza dals geniturs ils supplements da famiglia ("colliaziun subsidiara al mantegniment"). Cun resguardar las effectivas relaziuns famigliaras e cun abolir supplements parzials vegn per gronda part accumplì il giavisch "a mintg'uffant in supplement" ch'è vegnì pretendì da diversas varts. Er la nova lescha na po betg impedir cas gravants. Quels pon e duain dentant vegnir tgirads praticamain dals posts da provediment da las vischnancas. En questas situaziuns garantescha l'uffizi dal servetsch social il minimum d'existenza.

La cumpensaziun da las grevezzas tranter las differentas cassas da cumpensaziun per famiglias duai oravant tut distgargiar cassas che han ina structura da commembras e commembers dischavantagiusa. Quellas cassas han fin ussa stuì incassar tariffas da la contribuziun autas ed han per regla mo pudì pajar las prestaziuns minimalas. La cumpensaziun da las grevezzas na chaschuna tut en tut betg in augment da las contribuziuns dals lavurants e dals patruns. Las tariffas da la contribuziun e las prestaziuns da tut las cassas s'adattan dentant. Novas cassas privatas da famiglia na dastgan tenor la nova lescha dentant betg pli vegnir installadas en Grischun.

Persunas cun activitad da gudogn independenta: Vinavant da libra veglia
La regenza ha resguardà en il nov project divers giavischs exprimids durant la procedura da consultaziun. Ella renunzia en particular da suttametter obligatoriamain a la LSF tut las persunas cun activitad da gudogn independenta. Ultra da quai vegn renunzià formalmain a l'ordinaziun executiva dal grond cussegl actuala.

Areguard il punct finanzial è la nova basa giuridica neutrala per il chantun. Las vischnancas resp. lur servetschs socials vegnan distgargiads finanzialmain cun pajar ils supplements per uffants cumplains gia a partir d'in pensum da lavur da 20 pertschient.

Lescha da polizia: Regulaziun clera procura per confidenza
La regenza ha tramess en la consultaziun il sboz da la nova lescha da polizia. Cun quai duai vegnir definida en moda clera la libertad d'agir da la polizia grischuna, ultra da quai duai vegnir rinforzada vinavant la confidenza en si'activitad ed en ses agir.

Concret sa tracti da las incumbensas e da l'organisaziun sco er da la cunfinaziun da las cumpetenzas tranter la polizia chantunala e las polizias communalas. Plinavant vegn definida la collavuraziun cun auters corps da polizia, cun la confederaziun e cun organs privats da segirezza, e las uschenumnadas "mesiras repressivas da la polizia", inclusiv il diever d'armas da fieu, vegnan normadas sin stgalim da lescha. La lescha regla a la fin er dumondas da la protecziun giuridica da persunas ch'èn pertutgadas d'acziuns da la polizia. La consultaziun dura fin la fin da settember 2003.

ll tractament sin basa da heroin è sa cumprovà
ll tractament sin basa da heroin per persunas dependentas da drogas vegn introducì definitivamain en Grischun. La regenza vul cuntinuar cun il concept da manaschi suenter la finiziun da la fasa d'emprova da trais onns e mantegnair las 30 plazzas da tractament en la Neumühle a Cuira. Responsabels perquai èn ils servetschs psichiatrics dal Grischun.

Il post spezialisà Protecziun da l'uffant vegn definitivamain manà vinavant
Suenter ina fasa d'emprova da trais onns vegn il post chantunal da cussegliaziun per la protecziun da l'uffant definitivamain manà vinavant. Il "post spezialisà Protecziun da l'uffant" è domicilià tar l'uffizi dal servetsch social dal Grischun ed è dotà cun 160 pertschient da plazzas.

L'ordinaziun executiva revedida tar il dretg d'esters entra en vigur
Per il 1. d'avust 2003 entra en vigur la revisiun parziala da l'ordinaziun executiva dal cussegl grond tar la legislaziun federala davart ils esters ed ils fatgs d'asil. La revisiun cumpiglia surtut las adattaziuns al dretg d'esters da la confederaziun sco er a la nova organisaziun da la dretgira dal Grischun. Ultra da quai stgaffescha ella las premissas ch'il chantun sa possia participar finanzialmain a projects d'integraziun da persunas estras.

Sursaissa cun in'atgna chasa da tgira
La vischnanca da Sursaissa po avrir per il 1. da settember 2003 in'atga gruppa da tgira cun set letgs. La regenza ha concludì da registrar la gruppa da tgira dal center da Steinhausen da Sursaissa sin la "glista da partiziuns da pazients stabels" (glista da chasas da tgira).

Scumpartì la dieschma d'alcohol
La regenza ha scumpartì la dieschma d'alcohol da var 380'000 francs per l'onn da gestiun 2001/2002. Quels raps vegnan duvrads l'onn 2003 per mesiras preventivas, per tractaments, per la perscrutaziun sco er per scolaziun e perfecziunament. Tenor la lescha federala davart las bavrondas destilladas sto vegnir duvrada la part dals chantuns dal retgav net da l'administraziun federala d'alcohol per il cumbat da l'alcoholissem en ses motivs e sias consequenzas sco er per il cumbat da l'abus da drogas, narcotics e medicaments.

Da vischnancas e regiuns
- La regenza ha dà la permissiun per il plan da traject da duas occurrenzas da velo en fanadur resp. avust: il "challenge da las Alps 2003" sco er il "10avel giro da trais pajais".

Contribuziuns chantunalas a differentas instituziuns
- Il chantun Grischun sa participescha finanzialmain a dus projects d'interreg. Tar l'in, el vegn numnà "habitalp", vai per l'installaziun d'ina banca da datas transnaziunala per parcs naziunals. La banca da datas sa basa sin datas dal sistem geografic d'infurmaziun GIS. L'auter project, "Via Alpina", vul etablir ina ruta da viandar tras otg stadis da las Alps. La regenza ha approvà totalmain 160'000 francs per quels dus projects.
- Per il rempar en il Marchtobel sper Saas che protegia la lingia da la Viafier retica ha la regenza approvà 114'000 francs.
- Pervi da las bunas experientschas fatgas en il rom dal project per la tgira dal guaud giuven 1998-2002 ha la regenza approvà il "project collectiv da selvicultura 2003-2007" da l'entir chantun dals 182 possessurs publics e privats da guaud en il chantun Grischun. Ils custs totals muntan a var 7,5 milliuns francs. Var 1,3 milliuns francs ha ella gia garantì per divers projects.
- La vischnanca da Tujetsch survegn per la construcziun d'in lavuratori forestal ina contribuziun chantunala da ca. 85'000 francs.
- 64'000 francs survegn la vischnanca da Valchava per sanar il provediment d'aua en ils territoris Vallatscha e Muglin.

Projects da vias
- Per segirar las spundas da la punt dal Caselertobel da la via dal Schin e per lavurs d'impressari per il sviament da Claustra (traject Tschägibach-Drostobel) ha la regenza approvà var dus milliuns francs.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun