Dals 20 fin ils 26 da fanadur 2003 vegn ad avair lieu en il Centro Sportivo Tenero l'unica occurrenza da giubileum interchantunala dals chantuns da mediaziun en il rom da las festivitads da 200 onns. 40 giuvenils da tut il Grischun sa scuntran cun var 600 giuvenils dals auters chantuns da giubileum Argovia, Son Gagl, Turgovia, Vad e Tessin en il camp da sport per giuvenils da l'Argovia. Var 150 manadras e manaders vegnan ad esser responsabels per la purschida quotidiana. Latiers stat a disposiziun als giuvenils ina vasta paletta da curs sportivs e culturals. Tranteren pon els sa divertir en divers villages da trategniment e recreaziun.
Mintga di da camp vegn a sa preschentar in chantun da mediaziun a las participantas ed als participants. Il punct culminant or da vista grischuna è latiers natiralmain il di grischun. Mesemna, ils 23 da fanadur, vegnan las participantas ed ils participants a sa laschar gustar delicatessas culinaricas dal Grischun. La saira vegn a procurar la Grison-Night per in highlight cultural. Lou Geniuz e band sco er Spooman&Kubus vegnan a stgaudar en bravamain als kids, breakdancers e artists da grafitti vegnan a cumplettar l'occurrenza.
Da vart dal chantun Grischun è grischun sport responsabel per l'organisaziun dal di grischun e per la tgira da la delegaziun grischuna.

Gremi: uffizi per las scolas popularas e sport
Funtauna: rg uffizi per las scolas popularas e sport