La nova ordinaziun davart la furmaziun professiunala OFPr vul garantir a lunga vista "ina furmaziun professiunala optimala per tut ils basegns e secturs". Questa finamira sustegna er la regenza grischuna en sia consultaziun al departament federal da l'economia e punctuescha il medem mument: La furmaziun professiunala en il chantun Grischun sto segirar er en l'avegnir la generaziun giuvna per l'economia en las regiuns periferas e garantir la furmaziun da professiuns che na pon betg vegnir cumparegliadas cun la grondezza da classas dals centers economics da la Bassa.
En quest senn dumonda la regenza grischuna la confederaziun d'agiuntar l'ordinaziun cun disposiziuns spezialas per il sectur da las professiuns da sanadad e socialas; ultra da quai sto ella reglar cleramain cur che purschiders privats da la furmaziun da basa e supplementara ston vegnir subvenziunads. A la fin dumonda la regenza che la OFPr vegnia repassada per il sectur dals custs che ston vegnir spetgads. Spezialmain la midada da la finanziaziun da deficit ad in subvenziunament pauschal betg differenzià da la furmaziun professiunala tras la confederaziun engrevgiass supplementarmain il chantun Grischun en moda massiva areguard las finanzas. La lescha federala davart la furmaziun professiunala e la OFPr na duai pervi da quai betg entrar en vigur avant il schaner 2005 enstagl dal schaner 2004.

Il nov uffizi da militar e da protecziun civila cumenza il 2004 cun sia lavur operativa
En il departament da finanzas e militar dal Grischun vegnan unids a partir dal 1. da schaner l'uffizi per la protecziun civila e l'agid en cas da catastrofas ed il commando cirquital al nov "uffizi da militar e da protecziun civila". Latiers duain vegnir unidas incumbensas sumegliantas, evitadas duplicitads e realisadas sinergias cun ils posts da servetsch da sustegn. A vista mesauna vegn il nov uffizi er manà ensemen areguard il spazi. Il medem mument vegnan transferids en l'avegnir en las vischnancas ils posts dal schef da secziun e dal chau da l'uffizi da la protecziun civila ad ina singula persuna.

Nov model da taxas per la cussegliaziun agricula
Pli aut che l'interess public è per ina prestaziun, e pli bass che la taxa pretendida per quella è. Per il 1. da settember 2003 vegnan calculadas tenor quest princip las taxas per la cussegliaziun al center da furmaziun e cussegliaziun agricula Plantahof CFCA. Il spectrum dals pretschs variescha en las trais categorias "cussegliaziun en l'interess public predominant", "cussegliaziun en l'interess public parzial" e "cussegliaziun en l'interess privat" tranter nolla e stgars 100 francs l'ura. La regenza ha approvà la revisiun totala correspundenta da la tariffa da taxas. La confederaziun regla per il 1. d'avrigl 2004 l'agid finanzial per la cussegliaziun agricula e d'economia da chasa purila er tenor quest princip, però cun ina graduaziun pli fina.

Resalvas tar ina liberalisaziun memia sperta dal servetsch postal
La nova ordinaziun da posta oblighescha la posta tranter auter da manar ina rait cumpletta d'uffizis postals, da porscher vinavant la distribuziun da la posta a chasa, d'utilisar ils meds avant maun a moda economica e da trair a niz il potenzial da raziunalisaziun. La regenza grischuna salida la direcziun tschernida, avess dentant vesì gugent gia oz in sboz per las eventualas indemnisaziuns dals custs nuncuverts d'in tal servetsch universal. La confederaziun prevesa en questa dumonda d'elavurar pir alura in project, cur ch'ils instruments directivs actuals n'avessan betg pli da bastair. La regenza è ultra da quai s'exprimida en sia consultaziun al departament federal per ambient, traffic, energia e communicaziun d'eleger ina strategia precauta tar ulteriurs pass da liberalisaziun. Las experientschas fatgas fin ussa han mussà che las regiuns muntagnardas e periferas vegnian dischavantagiadas malgrà l'obligaziun da mantegnair in servetsch universal.

Gulivaziun da la forza fiscala 2004 cun ina quota da 84 pertschient
La regenza ha fixà la quota da gulivaziun 2004 per vischnancas deblas da finanzas sin 84 pertschient. Per quai ha ella deliberà var 14,5 milliuns francs.
La quota da gulivaziun gulivescha la forza fiscala relativa da las vischnancas cun dretg da contribuziun fin a 84 pertschient da la media chantunala. Sco vischnancas deblas da finanzas valan las vischnancas da la gruppa da forza finanziala quatter e tschintg. Il dretg da contribuziun han vischnancas cun in pe da taglia communala d'almain 120 pertschient.
Il medem mument ha la regenza fatg la classificaziun da las vischnancas en las gruppas da forza finanziala in fin tschintg per ils onns 2004 e 2005.

Revedì las disposiziuns executivas tar ils fatgs dal stadi civil
Per la fin da matg 2003 èn vegnids unids ils 198 uffizis da stadi civil da pli baud ad ussa 30; ultra da quai èn els vegnids colliads cun la banca da datas per il stadi civil da l'entira Svizra (infostar). Quai ha per consequenza ina revisiun da las "disposiziuns executivas tar l'ordinaziun executiva davart il stadi civil dal cussegl grond". La regenza ha approvà las adattaziuns correspundentas.

Da vischnancas e regiuns
- Reducziun dal tempo a Grono: Sin la via chantunala a Grono vegn reducida la sveltezza maximala en la regiun da la fermada dal bus "Grono Bivio Calanca" a 50 km/h (fin ussa 60 km/h).
- Pais maximal per la via da colliaziun Madernal-Pardomat: Da la bifurcaziun Punt Russein fin tar la punt dal Rain da Madernal vegn dauzà il pais maximal da fin ussa set a 13 tonnas resp. da mez matg fin mez october a 18 tonnas.
- Planisaziuns localas revedidas: La regenza ha approvà la revisiun da divers meds da planisaziun da las vischnancas da Bravuogn, Domat, Fanas, Calantgil, Vuorz e Breil.
- Leschas da taglia communalas revedidas: Las leschas da taglia communalas da las vischnancas da Claustra-Serneus, Filisur e Donat (creaziun nova da la lescha da taglia communala) pon entrar en vigur. La regenza las ha approvadas.
- Provediments d'aua: Per la sanaziun dal provediment d'aua da Cunter en il Partenz ha la regenza deliberà ina contribuziun chantunala da var 35'000 francs.

Contribuziuns chantunalas a differentas instituziuns
- Malauras 2002: Per sis ulteriurs projects da reparaziun en connex cun las malauras dal november 2002 (consorzi da vias Obernolla, vischnancas da Savognin, Mut, Cuira, Churwalden sco er la via da la Val Calanca) ha la regenza approvà var 1,1 milliuns francs.

Projects da vias
- Correcziun e schlargiament da la via da Scanvetg a St. Peter dadens il vitg e sviament Flem / galaria da segirezza Porta Vallorca: La regenza ha approvà domadus projects.
- Per l'infrastructura da segirezza en ils tunnels Crapteig, Isla Bella, Gotschna e Crap da Flem sco er per lavurs d'impressari vi da l'access Scuol vest e vi da la plazza da controlla per il traffic da camiuns pesants Unterrealta ha la regenza deliberà var 4,2 milliuns francs.

chanzlia chantunala dal Grischun

Gremi: Regenza
Funtauna: rg chanzlia chantunala dal Grischun