Navigation

Inhaltsbereich

  • Erste Mitteilung
  • Neuen Beitrag einfügen
Ina sanaziun sistematica dal dumber da nursas cunter la zoppina da nursas è pussaivla, sco quai che la situaziun actuala en il Grischun demussa exemplarmain. Dapi l'onn 1994 ha cumbattì l'uffizi da veterinari chantunal en moda consequenta cunter la zoppina tar ils effectivs indigens da nursas. Sconfittas han stuì vegnir registradas spezialmain, cura che muntaneras indigenas ed extrachantunalas èn vegnidas ensemen per l'alpegiada. Il servetsch da cussegliaziun e da sanadad per remagliaders pitschens SCSRP ch'è activ en l'entira Svizra ha surpiglià l'onn 2001 il concept grischun per cumbatter la zoppina ed introducì quest er en auters chantuns. Commembers dal SCSRP laschan uss controllar lur muntaneras tenor il concept grischun. Dapi lur vegn considerada ina gronda part da las tratgas da nursas grischunas sco libra da la zoppina respectivamain sco persistentamain sanada.
En il Grischun èn var 1'000 manaschis da nursas (ca. 2/3 dals effectivs da nursas dal Grischun) commembers dal SCSRP che vegn ad esser responsabel er per l'ulteriur cumbat cunter la zoppina en il chantun a partir da 2004. Statisticas dal martgà cumprovan il success dal cumbat sistematic cunter la zoppina: l'onn 2002 è stada la dumonda da tschuts da tratgas grischunas pli auta che la media svizra ed il retgav londeror cleramain sur quella.

Da vischnancas e regiuns
- Donat: Suenter che las duas vischnancas Donat e Pazen-Farden èn fusiunadas il 1. da schaner 2003 a la vischnanca Donat, ha uss approvà la regenza la nova constituziun communala.
- Planisaziuns localas revedidas: La regenza ha approvà la revisiun da differents meds da planisaziun da las vischnancas da Breil, Flearda, Ruschein e Haldenstein.
- Engiadin'ota: La regenza ha tractà il plan directiv regiunal "traffic": En quest connex ha ella approvà ils secturs "traffic en paus" e "concept da vias/traffic da velo". Ils secturs "concept general da traffic", "traffic sin via", "traffic public" e "traffic aviatic" ha ella prendì per enconuschientscha.

Contribuziuns chantunalas a differentas instituziuns
- Rempars a Rueun e Schlans: Per ils projects da reparaziun "Ual da Valdun" e "bova da Schlans" ha concedì la regenza totalmain var 1,1 milliuns francs. Domadus projects gidan er mintgamai a proteger las vias chantunalas.
- Provediment d'aua Duvin: Per engrondir e renovar il provediment d'aua ha la regenza mess a disposiziun var 39'000 francs.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel