La regenza vegn a preschentar al cussegl grond en la sessiun d'october 2003 in sboz per la revisiun da la lescha chantunala davart ils supplements da famiglia. La cumissiun permanenta per sanadad e fatgs socials dal cussegl grond ha tractà la missiva correspudenta da la regenza en sia seduta dals 22 da settember 2003 per mauns dal parlament.

Da princip è la cumissiun stada da perina che la regulaziun giuridica vertenta dals supplements da famiglia na satisfetschia pli a las relaziuns economicas e socialas actualas e ch'ina adattaziun a las relaziuns midadas saja inditgada.

Suenter ch'ins aveva decidì unanimamain d'entrar - schebain cun tschertas resalvas - ha la cumissiun fatg la discussiun en detagl dals singuls artitgels da la lescha. Tar divers artitgels èn stadas avant maun propostas da minoritad ch'èn vegnidas discutadas detagliadamain ed extendidamain. Quellas pertutgavan d'ina vart ils uffants resguardads e l'autezza dals supplements per uffants e da l'autra vart la gulivaziun da las grevezzas tranter tut las cassas da cumpensaziun per famiglias, quai vul dir tranter tala dal chantun e las cassas privatas da cumpensaziun per famiglias da las federaziuns professiunalas.

La missiva da la regenza è a la fin vegnida deliberada per mauns dal cussegl grond.

Gremi: cumissiun dal cussegl grond per sanadad e fatgs socials
Funtauna: rg cumissiun dal cussegl grond per sanadad e fatgs socials