La regenza grischuna dat en tut bunas notas a la nova ordinaziun davart ils medicaments veterinars OMV. La finamira principala da la nova OMV, la segirezza da las victualias, vegn sustegnida essenzialmain e la via ch'in medicament va davent da la producziun sur il commerzi fin l'applicaziun tar l'animal è cumpigliada a moda chapaivla. Uschia è vegnida creada ina premissa impurtanta per pudair chastiar eventuals abus. Manaschis da tratga d'animals da niz e praticas da medis d'animals da niz vegnan uss er integrads cumplessivamain en la responsabladad per la chapaivladad da la via dals medicaments. Gist uschè raschunaivla è l'intenziun da transferir l'execuziun als servetschs veterinars chantunals. Quests pon uschia er coordinar effizientamain autras incumbensas en il sectur da la tratga d'animals da niz. La finala garantescha la nova OMV er la capacitad d'exportar ils products svizzers en il rom dals contracts bilaterals cun la UE. Dapli quitads a la regenza fa il fatg che la OMV chaschuna in surpli d'expensas considerabel per ils chantuns, scriva la regenza en sia consultaziun a l'uffizi federal da sanitad.
A la lescha federala davart ils products terapeutics da l'onn 2002 appartegnan en tut sis ordinaziuns dal cussegl federal che han uss - per part cun midadas en cumparegliaziun cun lur entrada en vigur l'onn 2002 - percurrì sco "pachet d'ordinaziuns davart ils medicaments II" la procedura da consultaziun. Resch nova è mo la OMV.

Ordinaziun 1 tar la lescha da lavur: igl è vegnì exagerà
Quatter ordinaziuns cumpletteschan la lescha da lavur LL actuala. Cun la revisiun da l'ordinaziun 1 vul la confederaziun suttametter a la lescha da lavur da nov tut il persunal d'ospitals e da clinicas da dretg public, e quai per il sectur dal temp da lavur e da paus.
La regenza grischuna è da l'avis che las relaziuns da servetsch da dretg public en ospitals e clinicas porschian avunda protecziun a las emploiadas ed als emploiads en dumondas dal temp da lavur e da paus. Perquai n'èsi betg chapaivel pertge ch'il project da revisiun ch'era oriundamain restrenschì a medias assistentas e medis assistents duai vegnir extendì sin tut il persunal. La regenza refusa perquai questa ordinaziun.

Lavurs da concept per novs meds d'instrucziun èn vegnidas surdadas
La regenza vul introducir novs meds d'instrucziun per ils roms tudestg, talian ed istorgia: surtut per l'instrucziun da tudestg en las scolas talianas dal Grischun dal sid ed en la quarta fin la sisavla classa primara da las scolas rumantschas sco er per l'instrucziun d'istorgia en la sisavla classa primara ed en il stgalim superiur da las scolas talianas dal Grischun dal sid. Trais gruppas da project vegnan ad elavurar en il decurs da l'onn proxim la basa da decisiun correspundenta. Per questas lavurs da concept ha la regenza approvà var 25'000 francs.

Da vischnancas e regiuns
- Reconstrucziun suenter las malauras 2002: Per la reparatura e la protecziun da var 30 lieus cun donns vi da vias da guaud sco er diesch reparaziuns e protecziuns da zonas da distatga da bovas en las vischnancas da Bravuogn e Tinizong ha la regenza concedì var 430'000 francs.
- Vrin: La regenza ha approvà la revisiun da la lescha da taglia.
- Sursaissa: Sin la via chantunala tranter Affeier e Meierhof vegn la fracziun da "Chummenbühl" marcada sin ina lunghezza da 200 meters sco traject entaifer il vitg. La spertadad maximala importa qua 60 km/h.
- Planisaziuns localas revedidas: La regenza ha approvà la revisiun da differents meds da planisaziun da las vischnancas da Sta. Maria V.M., Schiers, Sumvitg e Tschlin.

Contribuziuns chantunalas a diversas instituziuns
- Associaziun da las ludotecas dal Grischun: Per l'onn da gestiun 2003 survegn l'associaziun ina contribuziun da sustegn da 20'000 francs.
- Clinica psichiatrica Beverin: Per edir il cudesch "Richard La Nicca - Bilder der Baukunst" ha la regenza approvà ina contribuziun totala da 124'000 francs.
- Institut per turissem e temp liber da la HTW Cuira / Academia Engiadina / BAK Basel Economics: Per ils projects "crear valurs regiunalas en il turissem", "subregiunalisaziun da prognosas turisticas en il territori alpin vi da l'exempel dal chantun Grischun" e "monitoring: structuras economicas regiunalas dal turissem en il chantun Grischun" ha la regenza garantì ina contribuziun totala da 125'000 francs.

Projects da vias
- Samedan: La regenza ha approvà il project per l'uschenumnà "sviament pitschen" (colliaziun da la via veglia engiadinaisa - cruschada Chaunt da San Bastiaun / via retica). Uschia pon vegnir guntgids il passadi da la viafier retica sper l'En e la stretga sin la via San Bastiaun.
- Trun: Il program da sanaziun cunter la canera per la via sursilvana è vegnì approvà.
- Vaz: Il nov passape per lung da la via dal Güglia entaifer il vitg da Lai (territori da Clavadorias) po vegnir construì. La regenza ha approvà il project e deliberà ina contribuziun chantunala da var 85'000 francs.

Chaussas persunalas
- Roger Widmer, Walzenhausen, è vegnì elegì sco revisur da taglia en l'administraziun da taglia. El cumenza sia plazza il 1. da schaner 2004.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun