Sch'i giess tenor la veglia da la confederaziun, abrogass la
revisiun da la lescha federala davart la protecziun da la natira e da la
patria cumplettamain la lescha existenta dal Parc Naziunal. La regenza
grischuna sa defenda vehementamain encunter quai.
14 contracts individuals reglan actualmain las relaziuns da dretg
tranter la Fundaziun dal Parc Naziunal Svizzer ed il chantun Grischun
resp. las vischnancas dal Parc. La lescha dal Parc Naziunal LPN da l'onn
1980 che vala acutalmain integrescha en ses princips questa concepziun
confurma al contract. Ord puntg da vista da la regenza grischuna è il
concept che sa funda dapi var 90 onns sin la basa da partenaris sa
cumprovà e na dovra nagina midada.
Discussiun nunnecessaria
La confederaziun vesa quai tut auter. Cun ina revisiun parziala da
la lescha federala davart la protecziun da la natira e da la patria LNP
duai tranter auter la LPN vegnir abrogada ed ils contracts existents
tranter la Fundaziun dal Parc Naziunal Svizzer ed il chantun resp. las
vischnancas dal Parc duain vegnir transferids "en vicendaivla
enclegientscha" en la nova reglamentaziun.
La regenza refusa energicamain questa pretensiun . L'intenziun da la
confederaziun, da transferir quest contract cumplex entaifer in termin
util ed en vicendaivla enclegientscha en la lescha federala revedida,
n'è betg bain ponderada. Contracts existents stuessan vegnir abrogads e
remplazzads entras contracts practimain identics. Tals vegnissan a
lantschar senza motiv stringent ina discussiun nunnecessaria davart la
cuntinuitad dal Parc Naziunal sco quai ch'el exista oz.
Gea tar revisiuns , però...
La revisiun parziala da la LNP vul da princip stgaffir ina basa
legala per parcs natirals e parcs da la cuntrada cun impurtanza
naziunala. En quest connex duain las iniziativas - ch'èn per part dretg
diffusas, betg unitaras e nuncoordinadas - da las differentas
autoritads, organisaziuns e purtaders per stgaffir parcs vegnir
suttamessas ad ina normaziun unitara. La regenza grischuna sustegna
quest'intent da la revisiun da la LNP. Quai en spezial er perquai ch'el
fixescha la collavuraziun voluntara da la populaziun pertutgada. En
quest connex duai mintgamai il chantun surpigliar ina rolla directiva
centrala.
Plinavant è la regenza grischuna er s'exprimida davart ils trais
tips da parcs ch'èn prevesids, davart las cunvegnas da prestaziun
tranter la confederaziun ed ils chantuns sco er davart l'idea d'in label
da parc. Il sustegn en general da la revisiun da la LNP da vart da la
regenza grischuna excluda però explicitamain l'abrogaziun senza
cumpensaziun da la lescha dal Parc Naziunal d'enfin ussa.
Ils contingents da permissiun 2003 èn repartids
Il cussegl federal concluda mintg'onn davart ils contingents da
permissiun chantunals per acquistar abitaziuns da vacanzas tras persunas
en l'exteriur. Per l'onn 2003 èn vegnids attribuids al chantun Grischun
sco enfin ussa totalmain 270 contingents.
Novas mesiras d'agid d'investiziun per la Viafier retica
Per l'amplificaziun da la cruschada Surovas (lingia dal Bernina da
la Viafier retica) ha la regenza approvà 720'000 francs. L'entir project
cumpiglia expensas da quatter milliuns francs, dals quals 82% vegnan
surpigliads da la confederaziun. La cruschada sto vegnir prolungada
d'ozendi 108 sin almain 165 meters.
Il chantun Grischun è chantun ospitant tar il "Sechseläuten 2004"
Il chantun Grischun è chantun ospitant tar la festa da primavaira
2004 da las corporaziuns turitgaisas. La regenza ha acceptà
in'invitaziun correspundenta dal comité central da las corporaziuns
turitgaisas.
Da vischnancas e regiuns
-
La regenza ha approvà da princip il project preparativ per
l'amplificaziun e la sanaziun da la chasa da scola primara da Salouf. En
quest connex è vegnida empermessa ina contribuziun chantunala da
739'000.
- La regenza ha approvà la revisiun totala davart la lescha da
taglia da la vischnanca da Poschiavo.
- Medemamain ha la regenza approvà la revisiun totala da la
planisaziun locala da Maton (lescha da construcziun, plan da zonas
parzial), da Mesauc (lescha da construcziun, piano generale delle
strutture "Albarella", piano generale di urbanizzazione "Albarella") e
da Zuoz (lescha da construcziun, plan da zonas Castell, plan general
d'avertura Castell, plan general da furmaziun Castell, plan general
d'avertura Mareg).
Contribuziuns chantunalas a differentas instituziuns
- La regenza sustegna cun ina contribuziun l'occurrenza da sport da
naiv "La nuit blanche" dals 21 da mars 2003 a Tavau. "La nuit blanche" è
il finale da la stagiun dal sport da naiv svizzer. En quest connex
vegnan undrads il megliers sportists da naiv svizzers da l'onn. Per il
final da snowboard da la FIS dals 13 als 16 da mars 2003 ad Arosa ha la
regenza medemamain approvà ina contribuziun. Tuttas duas occurrenzas èn
bunas plattafurmas per communitgar la "marca Grischun".
- 13 novas ovras d'art d'artistas grischunas e d'artists grischuns
vegnan en l'avegnir ad embellir stanzas da l'administraziun chantunala.
La regenza ha deliberà per quai in credit da ca. 23'500 francs.
- Per l'installaziun d'in sistem d'infurmaziun online davart l'art
en Svizra ha la regenza approvà ina contribuziun da 12'000 francs.
Projects da vias
Per las lavurs d'impressari supplementaras al sviament Claustra
(sectur portal da Selfranga e Punt Bim Bad) ha la regenza deliberà
390'000 francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun