Suenter ch'il project grischun d'intervenziun cunter violenza a chasa ha pudì vegnir lantschà il 1. da settember 2003 sut la direcziun dal post da stab per dumondas d'egualitad, ha gì lieu ultimamain l'emprima scuntrada da la maisa radunda.

Cussegliera guvernativa Eveline Widmer-Schlumpf ha beneventà las represchentantas ed ils represchentants da las autoritads ed organisaziuns participadas ch'eran vegnidas envidadas dal post da stab per dumondas d'egualitad dal chantun Grischun a la maisa radunda. En ses pled da bainvegni ha ella fatg attent al studi interreg "... perquai che paraids na san betg discurrer". Il studi aveva mussà ch'igl exista en il Grischun in basegn d'optimar la sensibilisaziun cunter violenza a chasa e da meglierar las pussaivladads tar la collavuraziun tranter autoritads ed organisaziuns. Il project d'intervenziun ch'è vegnì introducì fin uss en 10 chantuns e citads saja in instrument adequat per meglierar la relaziun tar questa problematica pretensiusa. Sulettamain cleras strategias d'agir ed ina collavuraziun interdisciplinara possian limitar la violenza a chasa e dar da chapir a medem temp che l'intoleranza da la violenza na sa ferma betg avant l'isch-chasa.

A la maisa radunda sa participeschan la polizia chantunala, la polizia da la citad da Cuira, la dretgira districtuala da la Plessur, l'autoritad tutelara da Razén, il post da cussegliaziun per l'agid a victimas dal Grischun, il servetsch social regiunal Partenz / Signuradi / Tschintg Vitgs, la chasa da dunnas dal Grischun, ina represchentanta da las migrantas, la polizia d'esters e la procura publica. La maisa radunda, a la quala las strategias d'intervenziun da las autoritads ed organisaziuns duain vegnir messas en dumonda e meglieradas, è il gremi il pli impurtant dal project. Gist en vista a l'offizialisaziun da la violenza a chasa en la legislaziun penala ed en la nova lescha chantunala da polizia ch'è vegnida tramessa en la consultaziun e che prevesa da spedir davent l'autur dal delict, ston vegnir chattadas novas furmas da la realisaziun. Durant la fasa da project che dura trais onns vegn la maisa radunda a sa radunar quatter fin sis giadas sut la direcziun dal post da stab per dumondas d'egualitad. Las sesidas vegnan manadas d'ina moderaziun externa.

Gremi: post da stab per dumondas d'egualitad
Funtauna: rg post da stab per dumondas d'egualitad