Stefan Engler, president da la regenza
I dat temps en ils quals tut sa mida. L'emprim na s'accorschan ins
strusch da quai. E sche tuts s'accorschan han ins savens gia manchentà
l'adattaziun ad uras. Ins sto pia midar insatge, avant ch'ils blers
s'accorschian ch'ins sto far las midadas.
Precis uschia ans vai oz cun il deficit dal maun public. In stadi
che ha ina giada fatg debits na sa senta betg pli en cas da concepir il
futur da la societad. El na giauda betg pli gronda confidenza tar las
burgaisas ed ils burgais, tar l'economia e tar ils investurs e - forsa
il mender - el creescha circumstanzas concernent la politica da finanzas
ch'èn ina chargia per las generaziuns futuras.
Il confess general da vulair sanar las finanzas dal chantun vegn anc
svelt fatg. Sch'i sa tracta però da la realisaziun, gartegi a tuts da
cumprovar cun arguments buns e fictivs che spargnar saja bain bun e
dretg, ma gist tar questa dumonda giaian ins vias pulainas. Da vulair
sanar las finanzas d'in chantun è ina incumbensa gist uschè cumplexa sco
difficila, oravant tut però nunpopulara. Quai è mo da dumagnar sch'ins
mussa communablamain la voluntad e la prontezza da bandunar las
posiziuns maximalas e da tschertgar cumpromiss stabils. Nus stuain puspè
emprender da pudair viver cun las resursas che stattan a disposiziun.
L'illusiun dal spargnar senza dolurs
La regenza ed il parlament n'han betg laschà per bun da far grondas
ponderaziuns davart la necessitad da gulivar las finanzas. Na, els han
agì en moda curaschusa e da lunga vesida cur ch'els han deliberà in
pachet da mesiras da passa 200 mesiras singulas per distgargiar las
finanzas dal chantun. Quest pachet da refurma duai - a partir da l'onn
2004 - surtut sbassar ils custs, auzar decisamain tschertas entradas e
metter en dumonda structuras bloccadas er entaifer l'administraziun
chantunala. La realisaziun da l'entir pachet da mesiras che duai metter
en urden las finanzas chantunalas, pretenda per part ina revisiun da
leschas chantunalas. Ils 30 da november da quest onn votain nus
Grischunas e Grischuns davart ina emprima part da quellas adattaziuns da
leschas. La regenza recumonda en quest connex d'approvar en moda
integrala las adattaziuns da leschas ch'il cussegl grond gida a purtar.
Cun acceptar ils 10 projects da lescha mussain nus che nus na vulain
betg viver permanentamain "a credit" e sur nossas relaziuns.
I renda da spargnar
Jau conced che spargnar po mintgatant esser dolurus, sche disas
daventadas charas vegnan tuttenina messas en dumonda. Ma gist quai
signifitga er ina schanza da metter en dubi chaussas tradiziunalas. I
vala la paina da s'engaschar per in stadi productiv e finanzialmain
saun, che stgaffescha per sias burgaisas e ses burgais insumma pir ils
spazis libers per furmar e concepir la vita sociala. Perquai è il pachet
da spargn er in project per il futur, per il qual i vala la paina da
s'engaschar.
Gremi: Regenza
Funtauna: rg Regenza