Claudio Lardi, cusseglier guvernativ
Il cussegl grond ha accordà l'instrucziun da linguas estras a las
scolas secundaras, realas ed a las classas pitschnas dal stgalim
superiur dal Grischun cun las relaziuns ed ils basegns dal Grischun sco
er reglà quella tenor las finamiras svizras surordinadas. El ha fatg
quai cun responsabladad e sa dond tutta fadia da chattar il meglier
concept per las scolaras ed ils scolars grischuns dentant er per noss
chantun triling. In concept che lascha anc spazi per ils impurtants roms
nunlinguistics.
La concepziun da l'instrucziun da linguas estras persvada - quai
conferma in'expertisa - er dal puntg da vista linguistic. Ella
garantescha en l'instrucziun quella cuntinuitad ch'è decisiva per
emprender ina lingua. Il concept sa basa sin la persvasiun che nossas
trais linguas chantunalas èn linguas naziunalas cumplainas ed in bain
prezius ch'igl è bun da promover e da tgirar er en vista a nossa
economia. La situaziun linguistica en il Grischun è autra che quella en
chantuns monolings. Quest fatg dastgan e duain ins defender. Igl è in
fatg incontestà che tut ils giuvenils emprendan supplementarmain la
lingua mundiala englais. Ma perquai ch'er il franzos ha sia muntada, ha
il cussegl grond garantì che mintga scolara e mintga scolar ha, sch'el
vul, la pussaivladad d'emprender franzos al stgalim superiur da la scola
populara.
Ils 30 da november 2003 vuschais Vus, charas conburgaisas e chars
conburgais, davart l'uschenumnada iniziativa da linguas. Questa
iniziativa sto vegnir refusada per motivs da la politica da furmaziun,
economica e da linguas.
1. L'iniziativa surdumonda las scolaras ed ils scolars ch'han auters
duns che quels linguistics e marginalisescha scolaras e scolars cun
difficultads d'emprender. En nagin auter chantun na prendan ins en
consideraziun da ristgar da far in experiment cun scolaras e scolars, a
moda ch'en la 1. classa da la scola reala e secundara vegn entschavì cun
l'instrucziun da lingua estra en ina segunda lingua naziunala e cun
l'instrucziun d'englais. Per scolaras e scolars da la 7. classa
chaschuna l'iniziativa:
- per part in augment massiv dal dumber da las lecziuns
obligatorias; p.ex. 40 lecziuns obligatorias, da las qualas 15 lecziuns
da lingua a l'emna per Rumantschas e Rumantschs,
- l'entschatta a medem temp cun duas linguas estras, uschia ch'ins
perda la cuntinuitad en l'acquisiziun d'ina lingua,
- uras libras en l'urari e malnizzaivlas, cumplicaziuns tar ils
transports da scolaras e scolars,
- fin da la scola pli tard e damain temp per far pensums, per
participar a la vita da famiglia, per absolver roms facultativs u per sa
deditgar ad activitads ordaifer la scola (musica, sport).
2. Dal puntg da vista da l'organisaziun n'è l'iniziativa strusch
realisabla per la scola populara e per las vischnancas. Ella chaschuna
annualmain custs supplementars da var 5 milliuns francs al chantun ed a
las vischnancas.
3. Las scolas ston integrar ulteriuras lecziuns obligatorias da
lingua per classa en la planisaziun da l'instrucziun, ston metter a
disposiziun stanzas da scola, engaschar las persunas d'instrucziun
necessarias ed organisar ils transports basegnaivels da scolaras e
scolars.
4. L'iniziativa indeblescha las linguas chantunalas talian e
rumantsch. Gia il titel "iniziativa per mantegnair l'egualitad da las
schanzas da la giuventetgna grischuna" po svegliar il sentiment che las
linguas naziunalas duvradas en il chantun sajan bain bunas; ma che
egualitad da las schanzas haja mo, tgi che lascha d'ina vart nossas
linguas chantunalas.
5. Il Grischun talian vegn discriminà: Dal Grischun talian vegnissan
en l'entira Svizra ils sulets giuvenils senza instrucziun obligatoria
d'englais.
6. Perder, per cas che l'iniziativa vegniss acceptada, perdess
segiramain ed en mintga cas ina lingua chantunala. Schizunt il giudicat
linguistic spezial dumandà constatescha che l'iniziativa ha in pitschen
resultat per il franzos e ch'ella indeblescha las linguas chantunalas.
Il cussegl grond As recumonda cun 93 : 6 vuschs da refusar
l'iniziativa. Jau As recumond ensemen cun la regenza e cun persvasiun,
da votar da NA a l'iniziativa per mantegnair l'egualitad da las schanzas
da la giuventetgna grischuna; ina iniziativa ch'è sbagliada dal puntg da
vista da la politica da linguas e da furmaziun.
Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da
l'ambient