La regenza prenda posiziun davart il segund sboz da la revisiun da
la OPC. Ella deplorescha la prolungaziun dals termins per sanar las vias
cunter la canera (fin ils 31 da mars 2015 per las vias naziunalas, fin
ils 31 da mars 2018 per las vias principalas e per tut las autras vias),
tant pli che quella na fiss necessaria tenor il stadi da la realisaziun
en il chantun Grischun. Tuttina è ella conscienta che las prolungaziuns
dals termins proponidas èn inevitablas sco consequenza da las mesiras da
spargn da la confederaziun.
Cun la refurma da la gulivaziun da finanzas ed incumbensas tranter
la confederaziun ed ils chantuns (RFI) vegn la confederaziun a sa
retrair da l'execuziun e da la finanziaziun da sanaziuns cunter la
canera. Cun in sguard sin l'ulteriura concretisaziun da la NGF dumonda
la regenza da garantir che las contribuziuns da sanaziun restantas da la
confederaziun da var 1,4 milliardas francs vegnian er repartidas als
chantuns. Salidadas vegnan la simplificaziun e l'optimaziun da la
procedura per sanar las vias cunter la canera.
Consultaziun cumplementara concernent la revisiun da la lescha
davart las armas
En ina consultaziun cumplementara concernent la revisiun da la
lescha davart las armas refusa la regenza la registraziun proponida dal
possess d'armas. Tenor l'avis da la regenza na sa lascha uschia betg
cuntanscher la finamira centrala avisada da la revisiun, numnadamain da
cumbatter en moda effectiva l'abus d'armas cun mesiras preventivas.
Plinavant vegn la refusa motivada cun problems executivs pratics en ils
chantuns sco er cun aspects giuridics da la lescha federala davart la
protecziun da datas.
Revisiun totala da la lescha da submissiun
La regenza ha deliberà per mauns dal cussegl grond la missiva tar la
cunvegna interchantunala davart las acquisiziuns publicas revedida e
davart la revisiun totala da la lescha da submissiun. Cun la
participaziun a la cunvegna interchantunala vegn realisada la cunvegna
bilaterala tranter la UE e la Svizra concernent las acquisiziuns
publicas. Il medem mument vegnan armonisadas en l'entira Svizra diversas
prescripziuns da submissiun. Per il martgà naziunal duain vegnir
dauzadas las limitas minimalas existentas che decidan tge tip da
procedura che vegn duvrà. La missiva vegn tractada dal cussegl grond en
la sessiun dal favrer 2004. La messa en vigur dals decrets revedids è
previsa per la mesada dal 2004.
Lescha davart la promoziun da la tgira d'uffants cumplementara a la
famiglia en il chantun Grischun
La lescha davart la promoziun da la tgira d'uffants cumplementara a
la famiglia en il chantun Grischun vegn messa en vigur per ils 15 da
november 2003. Il medem mument relascha la regenza las disposiziuns
executivas respectivas. Il pievel grischun aveva acceptà questa lescha
ils 18 da matg 2003.
Da vischnancas e regiuns
- Madulain: Il plan da zonas parzial e plan general da furmaziun
1:1'000 Fops dals 13 d'avust 2003 vegn approvà cun la resalva ch'i
stoppia vegnir resguardada en la part da l'ost da la zona ina distanza
minimala da 18 m envers la lingia da la viafier retica per locals
sensibels a canera.
- Tavau, Tusaun: Las revisiuns parzialas da las constituziuns
communalas èn vegnidas approvadas da la regenza.
- Bravuogn: La regenza ha concludì d'integrar la revisiun dal
cataster da Bravuogn, sort 5, en il program da mesiraziun 2003.
- Seewis: La revisiun da la mesiraziun uffiziala da Seewis, sort 3,
vegn approvada da la regenza.
- Braggio: La revisiun parziala da la lescha da taglia po entrar en
vigur. La regenza l'ha approvada.
- Castaneda: La revisiun totala da la lescha da taglia da la
vischnanca da Castaneda vegn er approvada da la regenza.
Contribuziuns chantunalas a diversas instituziuns
- Teater da la citad da Cuira: Per la stagiun 2003/2004 vegn
concedida da la regenza ina contribuziun da 180'000 francs.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun