A partir da 2004 vegnan las vischnancas a stuair pajar 40 enstagl da 30 francs per uffant e di da scola a las scolas spezialas. La regenza ha approvà la revisiun parziala da las disposiziuns executivas tar la lescha d'impedids. Necessaria daventa ina nova repartiziun dals custs, perquai che la confederaziun reducescha sias contribuziuns a las scolas spezialas cun ses program da distgargia. Per las scolas spezialas en il Grischun chaschuna quai perditas d'entradas da var 770'000 francs. Las vischnancas portan circa dus terzs, il chantun in terz da quellas.

Surveglianza da scola e da scolina: i restan anc tschintg districts d'inspecziun
En il sectur da la surveglianza da scola vegn il chantun Grischun da nov repartì en tschintg districts d'inspecziun. En quels vegnan integrads ils set inspecturats da scola ed ils quatter inspecturats da scolina, las dudesch regiuns dal servetsch psicologic da scola e las 32 regiuns da cussegliaders per la gimnastica da scola da fin uss. Ils singuls teams districtuals e lur prestaziuns da servetsch vegnan accordads da nov vicendaivlamain fin l'onn da scola 2004/2005. Er las 17 localitads privatas da fin uss vegnan bandunadas en favur da tschintg centers regiunals d'inspecziun a Tusaun, Landquart, Glion, Samedan e Puschlav.

Da vischnancas e regiuns
- Maiavilla: La regenza ha approvà il concept da sanaziun cunter la canera per la via naziunala N 13, la via dal Luzisteig, la via da Ragaz, la via da Fläsch, la via da Jenins e la via da Boval en il sectur da la vischnanca.
- Planisaziuns localas revedidas: La regenza ha approvà la revisiun da differents meds da planisaziun da la vischnanca da Scuol.
- Consorzi per aua persa da l'Engiadin'ota: Suenter che la vischnanca da Silvaplauna è extrada dal consorzi, han ins stuì reveder parzialmain il statut d'organisaziun. La regenza ha approvà la nova versiun.
- Malauras 2002: La regenza ha approvà differentas mesiras da reparaziun sin il territori da las vischnancas da Savognin, Degen, Masagn, Farschno e Scharàns, Domat, Trimmis, Molinis, Pasqual, Roten, Cazas e Castrisch.

Contribuziuns chantunalas a diversas instituziuns
- Fundaziun istorica militara dal chantun Grischun: Per endrizzar in museum dal train sin il St. Luzisteig èn vegnids concedids 20'000 francs.
- Almanacco Mesolcina-Calanca: La regenza ha approvà 6000 francs per l'ediziun da la 67avla annada 2004. Contribuziuns da sport-toto: Var 12'000 francs survegnan per differents projects il CS Bernina Puntraschigna, il club da hockey Cuira Capricorns, l'uniun da gimnasts artistics dal Grischun ed ils tiradurs da sport Landquart.

Persunal
- Urs Ackermann, Cuira, è vegnì elegì sco adjunct e manader da l'analitica en il laboratori chantunal per controlla da victualias.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun