Tenor las cifras las pli novas da las statisticas da la SUVA èn
capitads l'onn passà 227 accidents da lavur en las interpresas ed ils
manaschis forestals dal Grischun ch'èn segirad(a)s tar la SUVA. Tar in
pensum da lavur che correspunda a totalmain 703 forzas da lavur cun in
pensum da lavur cumplain èn quai 323 accidents sin 1000 persunas
occupadas a temp cumplain.
Per l'emprima giada dapi 1997 è cun quai puspè vegnì surpassà
cleramain il cunfin da 300 persunas cun accident sin 1000 persunas
occupadas a temp cumplain. Dapi diesch onns èsi ultra da quai l'emprima
giada che las cifras grischunas èn cleramain pli autas che la media
svizra ch'importava l'onn passà 294 accidents sin 1000 persunas
occupadas a temp cumplain.
Nagin connex cun ils donns da malaura 2002
Tenor l'avis dals responsabels da la SUVA sa chatta l'augment dal
dumber d'accidents en questa dimensiun entaifer la dispersiun statistica
e na po perquai betg vegnir valità cleramain sco indizi per in
pegiurament general da la segirezza da lavur en ils manaschis forestals
grischuns. Surprendentamain na pon ins er betg constatar in connex cun
ils donns da malaura dal november 2002. Schebain ch'il servetsch
forestal è stà occupà a partir da l'emprima ura intensivamain ed il pli
davant cun las mesiras d'urgenza privlusas e cun las emprimas lavurs da
rumida, na sa lascha betg constatar ina frequenza d'accidents
extraordinaria il november 2002.
Il squitsch dals custs ha ina influenza negativa sin la segirezza da
lavur
Tenor Hans Sonderegger, l'inspectur responsabel da la SUVA, na po
betg vegnir exclus ch'il squitsch dals custs creschent haja consequenzas
negativas per la segirezza da lavur en ils manaschis forestals. Tar
bleras visitas da manaschis al haja dà en egl l'atmosfera deprimida che
saja bain d'attribuir a las mesiras da spargn adina pli massivas
entaifer las vischnancas. Meds da manaschi che mancan e collavuraturs
che stoppian avair tema per lur plazza da lavur engrevgeschan il clima
da lavur e pericliteschan uschia ina da las premissas fundamentalas per
meglierar la segirezza da lavur. Mo persunal forestal motivà e bain
equipà po far la lavur da guaud en moda professiunala e cun la segirezza
la pli gronda pussaivla.
Gremi: uffizi forestal dal Grischun
Funtauna: rg uffizi forestal dal Grischun