Meglra che la prestaziun da l'examen d'admissiun è e pli auta che la rangaziun è; e quai è puspè decisiv per surdar las plazzas da scolaziun libras a las scolas medias grischunas. Quai èn ils puncts essenzials da la revisiun da la "ordinaziun davart ils examens d'admissiun a las scolas medias grischunas". Il cussegl grond aveva decidì l'avust da limitar il dumber da novas entradas a las scolas medias grischunas per ils onns 2004 fin 2007. Las cifras maximalas fixadas ha la regenza uss integrà en l'ordinaziun revedida:
- onn da scola 2004/05: per l'emprima classa dal gimnasi inferiur, 274; per la terza classa dal gimnasi, 204; per l'emprima classa da la scola media professiunala e commerziala, 158;
- onn da scola 2005/06: per l'emprima classa dal gimnasi inferiur, 284; per la terza classa dal gimnasi, 201; per l'emprima classa da la scola media professiunala e commerziala, 159;
- onn da scola 2006/07: per l'emprima classa dal gimnasi inferiur, 266; per la terza classa dal gimnasi, 211; per l'emprima classa da la scola media professiunala e commerziala, 156;
- onn da scola 2007/08: per l'emprima classa dal gimnasi inferiur, 244; per la terza classa dal gimnasi, 218; per l'emprima classa da la scola media professiunala e commerziala, 164.
Per betg surpassar questas cifras maximalas n'han lieu ils onns 2005, 2006 e 2007 nagins examens d'admissiun per la segunda classa dal gimnasi inferiur.
L'ordinaziun revedida davart ils examens d'admissiun a las scolas medias grischunas va en vigur il 1. da december. Las disposiziuns spezialas per la procedura d'admissiun e per l'examen d'admissiun valan fin ils 31 d'october 2007.

Var 705'000 francs per la tgira d'uffants cumplementara a la famiglia l'onn 2004
La regenza ha fixà ils custs normads e la tariffa da contribuziun per la tgira d'uffants cumplementara a la famiglia per l'onn 2004. La tariffa dals custs normads (custs da persunal, da locals, d'indrizs e d'administraziun) per ura da tgira ed uffant importa l'onn 2004 8.40 francs tar maximalmain var 560'000 uras da tgira. Qua tras resultan expensas totalas da var 4,7 milliuns francs. Da quai surpiglia il chantun 15 pertschient u var 705'000 francs.

Mediatur public da la confederaziun n'è nagina schliaziun
In cumportament manaivel a la populaziun duai esser ina incumbensa da tut ils posts d'administraziun e da tut las autoritads e na dastga betg vegnir excorporà ad in servetsch da mediaziun, scriva la regenza grischuna en sia consultaziun davart il sboz per ina lescha federala davart il servetsch da mediaziun da la confederaziun. Ni la communicaziun da las autoritads federalas na vegn meglierada ni las situaziuns da conflict na vegnan schliadas meglier. I porta dapli da persequitar vinavant consequentamain la via da fin uss: sensibilisar permanentamain las collavuraturas ed ils collavuraturs per ils giavischs da las burgaisas e dals burgais, far ina lavur activa d'infurmaziun e da medias ed applitgar decididamain plattafurmas electronicas da communicaziun. Qua tras èn l'administraziun e las autoritads gia vegnidas rendidas massivamain pli accessiblas per la populaziun en cumparegliaziun cun pli baud. L'introducziun planisada dal princip da publicitad appartegna medemamain a questa lingia.

Sessiun da las chombras federalas en il Grischun rumantsch: il Grischun vul giugar ina rolla activa
La regenza grischuna sustegna la realisaziun d'ina sessiun da las chombras federalas en il Grischun rumantsch. Uschia pudess il chantun far enconuschent anc meglier la lingua e la cultura rumantscha al parlament federal ed ad ina vasta publicitad. Sia eventuala rolla sco ospitant vul il chantun promover cun engaschi e sustegnair ils biros da las chombras federalas tar l'evaluaziun dal lieu da realisaziun, scriva la regenza en ina brev al biro dal cussegl dals chantuns.

Da vischnancas e regiuns
- Tavau: La regenza ha approvà il program da sanaziun cunter la canera per la via dal Partenz, per la via dal Flüela e per la via dal Landwasser sin l'intschess da la vischnanca.
- Trun: Ina dustanza en la Val Farbertg duai proteger d'ulteriuras bovas in sectur fitg destabilisà per lung da la via chantunala per Schlans. La regenza ha approvà il project.
- Domat: La via da velos per Cuira vegn uss er catramada sin ils 350 meters en il sectur da la staziun da Favugn (traject parzial sin territori da la vischnanca da Domat). La regenza ha approvà il project e concedì ina contribuziun chantunala da var 17'000 francs.
- Fanas: Var 237'000 francs ha la regenza approvà per l'emprima etappa da las lavurs da renovaziun dal provediment d'aua.

Contribuziuns chantunalas a diversas instituziuns
- Fond da sport-toto: Totalmain var 40'000 francs ha la regenza approvà per il club da curling La Punt-Chamues-ch, il club da skis Tavau, il club da tennis Domat, la basa da trenament Grischun central, il club da skis Rinerhorn Tavau, il team da skis e snowboard Surselva ed il club da ballarait Panaduz.
- Tgira da monuments: Cun totalmain var 222'000 francs vegnan sustegnidas las reparaziuns d'ina stalla dubla ad Avras Giuf, dil "crocodil dal Bernina" e d'ina chasa d'abitar a Tiraun (Trun).
Projects da vias
- La regenza ha approvà la construcziun nova dal tunnel Val d'Infern sin la via da la val Calanca tranter Grono e Rossa. Ils custs totals importan var indesch milliuns francs.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun