Las vischnancas grischunas survegnan quest onn contribuziuns da gulivaziun da finanzas da totalmain var 21 milliuns francs. Da quels vegnan duvrads var dudesch milliuns per la gulivaziun da la forza fiscala, var sis milliuns per contribuziuns ad ovras publicas e var 2,5 milliuns per la gulivaziun dal basegn spezial (sanaziun da finanzas communalas e contribuziuns a studis da fusiun). Per l'emprima giada ha er il conclus dal cussegl grond dal november 2000 in effect, numnadamain da sbassar las contribuziuns da finanziaziun da diesch sin sis pertschient.

Novas reglas da procedura per promover il sport
La federaziun grischuna per il sport FGS survegn per sias activitads durant l'onn proxim ina contribuziun chantunala da 28'500 francs. Cun quests daners po la FGS en emprima lingia pajar il premi grischun da sport. Da nov surpiglia l'uffizi per la scola populara ed il sport ina gronda part da las lavurs da secretariat da la FGS, cunzunt l'examinaziun preliminara da las dumondas da sustegn dal fond SwissLotto-SwissLos. Questas dumondas vegnan uss liquidadas cun agid d'ina procedura graduada.

Damain daners per la tgira da monuments
Las contribuziuns chantunalas en il sectur da la tgira da monuments vegnan reducidas per persunas privatas da 20 sin 16,8 pertschient e per instituziuns publicas da 15 sin 12,6 pertschient. La regenza ha revedì correspundentamain il "reglament per pajar contribuziuns a las mesiras per la protecziun da la natira e da la patria". Questa revisiun parziala è ina mesira per sanar las finanzas chantunalas. L'onn 2004 ha ella per consequenza respargns da var 1/4 milliun, ils onns successivs respargns da var 1/2 milliun francs l'onn.

La regenza approvescha il concept general da la refurma da la giustia 2
Novas sfidas per l'organisaziun giudiziala han chaschunà la refurma da las dretgiras d'emprima instanza ch'è er vegnida acceptada dal pievel il mars 2000. Uss èn vidlonder er la dretgira chantunala e la dretgira administrativa. La regenza ha approvà il concept general per la refurma da la giustia 2. L'organisaziun dal project prevesa da consultar, ultra d'ina cumissiun d'experts cun in secretariat da project, er in expert extern. In palpiri da tesas davart la refurma da la giustia 2 vegn spetgà fin la primavaira 2005.

Totalmain quatter projects da votaziun ils 8 da favrer 2004
La regenza ha concludì da suttametter il project pertutgant la "revisiun totala da la lescha davart ils supplements da famiglia" ils 8 da favrer 2004 a la votaziun dal pievel. Ultra da quai vegn votà la medema dumengia da votaziun er davart trais projects federals:
- cuntraproject a l'iniziativa dal pievel "avanti - per autostradas segiras e da gronda capacitad";
- midada dal dretg d'obligaziuns (la locaziun);
- iniziativa dal pievel "internament a vita duranta per delinquents sexuals e violents fitg privlus ed indifferents a la terapia".

Nova elecziun dals derschaders districtuals ils 16 da matg 2004
La fin da l'onn 2004 terminescha la perioda d'uffizi da quatter onns dals derschaders districtuals. La regenza ha decretà la nova elecziun per ils 16 da matg 2004 e relaschà las directivas correspundentas per quest intent. Las dretgiras districtualas ensemen cun las vischnancas èn responsablas per exequir l'elecziun.

Da vischnancas e regiuns
- Valzeina e Rueun: Domaduas vischnancas amplifitgeschan lur provediment d'aua e survegnan per quai ina contribuziun chantunala da totalmain var 42'000 francs. L'amplificaziun è er ina part da la reparaziun suenter las malauras dal november 2002.
- Medel (Lucmagn): Il consorzi d'aua Mutschnengia po far quint cun ina contribuziun chantunala da maximalmain var 174'000 francs per sanar e cumplettar il stabiliment dal provediment d'aua.

Contribuziuns chantunalas a diversas instituziuns
- Consorzi tariffar d'abunaments Engiadin'ota: Il chantun surpiglia er quest onn 40 pertschient u var 330'000 francs dals custs dal consorzi tariffar.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun