TEMAS 2004: "ARCHITECTURA-FURMAR-ALPS-CONCEPIR"
L'onn proxim dat la ARGE ALP (cuminanza da lavur da las regiuns alpinas) puspè ses premi da renconuschientscha e da promoziun per prestaziuns spezialas en las regiuns alpinas. Questa giada vegnan tschertgads projects architectonics che represchentan en moda speziala architectura moderna e d'auta qualitad e ch'èn concepids ultra da quai sco objects da lunga durada. Il premi importa 15'000 euro.

Il premi duai metter in accent cun effect en la publicitad per la renconuschientscha da projects innovativs davart ils temas "architectura-furmar-Alps-concepir". Quests temas duain en emprima lingia avair in connex cun ils basegns dals umans en lur ambient direct.

L'ARGE ALP tschertga concepts generals che correspundan a la pretensiun d'ina qualitad architectonica moderna, ch'èn concepids a lung termin e che cuntentan las aspectativas da la persistenza en la furmaziun da l'artg alpin. Quests concepts ston gia esser realisads a partir da l'onn 1995 e quai cun agid da pliras ovras da construcziun resp. els ston esser en construcziun. Il dretg da participaziun han patruns da construcziun, architects, planisaders, interprendiders, citads, vischnancas, federaziuns ed administraziuns regiunalas dal territori dals stadis da l'ARGE ALP.

La giuria sa cumpona da represchentants dals stadis da l'ARGE ALP. Ella vegn presidiada dal guvernatur tirolais Herwig van Staa ch'è fin mez 2004 er president da l'ARGE ALP. Il termin d'inoltraziun dura fin ils 12 da mars 2004. La distribuziun dals premis vegn fatga en il rom da la conferenza dals schefs da las regenzas da l'ARGE ALP il zercladur 2004 en il Tirol.

Commembers da l'ARGE ALP èn ils chantuns Grischun, Son Gagl e Tessin, ils stadis federativs Salzburg, Tirol e Vorarlberg, las provinzas autonomas Bulsan-Tirol dal sid e Trento, la regiun Lumbardia, il stadi liber da la Baviera sco er il stadi federativ Baden-Württemberg.

Gremi: ARGE ALP, gruppa lavur da publicitad
Funtauna: rg chanzlia chantunala dal Grischun