La confederaziun è proprietaria da la plazza aviatica da Samedan.
Ella ha duvrà questa plazza aviatica regiunala durant decennis per
intents militars. Da la vart civila la maina l'associaziun eroport da
l'Engiadin'ota (AEO). La confederaziun smetta cun il manaschi da
l'aviaziun militara per la fin da l'onn 2003 ed ha l'intenziun da vender
al chantun Grischun sco nov proprietari exclusiv las parcellas da la
plazza aviatica, ils edifizis (staziun da commando, hangars e halla da
parcar), las mobiglias ed ils vehichels, che tutgan ad ella. Questas
immobiglias e l'inventar po il chantun surpigliar sco facultad
finanziala. La regenza ha approvà questa cumpra en la sesida dals 8 da
december 2003.
Ina nova societad duai surpigliar il manaschi
Il chantun vul garantir in manaschi reglà d'aviatica civila, senza
manar sez questa plazza aviatica regiunala e senza far sez investiziuns.
Cun la retratga da la confederaziun dal manaschi e da las investiziuns
sa preschenta per la AEO ina nova situaziun. La confederaziun è sa
participada fin ussa en ina dimensiun considerabla als custs da manaschi
ed a las investiziuns. Ils proxims onns èn necessarias fitg grondas
investiziuns en ils edifizis, ils indrizs e l'infrastructura per manar
vinavant in manaschi aviatic segir.
La AOE posseda bain ina nova concessiun da 30 onns ed in concept da
manaschi correspundent. Suletta n'è ella dentant betg en cas da far las
investiziuns necessarias e da cuvrir ils custs da manaschi. Ella vegn a
manar vinavant il manaschi d'aviatica mo uschè ditg fin ch'ina nova
societad surpiglia il manaschi. Il chantun vuless stipular cun la AEO
ina cunvegna d'utilisaziun limitada per la durada da l'entschatta da
l'onn 2004 fin a la surdada dals dretgs d'utilisaziun ad ina nova
societad utilisadra.
Il chantun resta proprietari
Il chantun è en contact cun interessents che vulessan manar la
plazza aviatica a pli lunga vista. El è entrà en contact cun ina nova
societad utilisadra interessada. Tranter il chantun e la nova societad
utilisadra èn gia vegnidas fatgas impurtantas lavurs preliminaras per
stipular ina cunvegna da fittanza e da manaschi. Il chantun duai tuttina
restar proprietari da l'areal da la plazza aviatica.
En ina buna cooperaziun dals participads directamain pertutgads ed
interessads sa mussa ina soluziun da lunga durada ch'è d'avantatg per la
politica regiunala e ch'è economicamain purtabla. Oz ha lieu la
radunanza generala da la AEO, en la quala vegnan tematisadas las midadas
previsiblas che pertutgan la plazza aviatica da Samedan.
Gremi: regenza
Funtauna: rg departament da finanzas e militar