Navigation

Inhaltsbereich

  • Erste Mitteilung
  • Neuen Beitrag einfügen
Las collavuraturas ed ils collavuraturs da l'administraziun chantunala e las persunas d'instrucziun da las scolas popularas na survegnan nagin supplement da chareschia l'onn 2004.

La chareschia muntava la fin da november 2003 a 0,5 pertschient. Tar la tractativa dal pachet da spargn la stad passada aveva il cussegl grond però concludì da reducir en general la cumpensaziun da chareschia per 0,5 pertschient e da spargnar uschia var 1,5 milliuns francs.
Actualisà las tariffas da taxas per prestaziuns da servetsch dal DIEP e dal DGPS

Il departament da l'intern e da l'economia publica (DIEP), il departament da giustia, polizia e sanitad (DGPS) e la polizia chantunala grischuna han adattà lur tariffas da taxas e da calculaziun per l'onn 2004: tar il DIEP per permissiuns ed activitads en il rom da la lescha da lavur (approvaziuns da plans, permissiuns da manaschi, expertisas da plans, permissiuns da temp da lavur e disposiziuns tenor la lescha da lavur) e tar il DGPS en il sectur da sanitad (sectur da victualias ed inspecziuns da manaschis da medicaments). Tar la polizia chantunala è l'entira basa da calculaziun vegnida repassada ed adattada. Tut las mesiras stattan en connex cun la sanaziun da las finanzas dal chantun.

La revisiun da la lescha da pestga entra en vigur il favrer
La fin da november 2003 han las votantas ed ils votants dal Grischun approvà la revisiun parziala da la lescha chantunala da pestga. La regenza ha uss approvà la "ordinaziun davart l'incassament da multas disciplinaras tar surpassaments dal dretg da pestga" e la revisiun da las prescripziuns da pestga. La lescha revedida entra en vigur il 1. da favrer 2004.

"GRiforma": trais ulteriurs posts da servetsch sa participeschan
La praschun Sennhof, l'uffizi da planisaziun e l'uffizi per la natira e l'ambient vegnan da nov recepids en il project "GRiforma". Previsiblamain vegn il Sennhof ad elavurar l'onn 2005 ses preventiv tenor las directivas da "GRiforma", ils auters lur preventivs previsiblamain l'onn 2006. Da 2003 fin 2005 dura per "GRiforma" anc ina fasa d'emprova prolungada.

Il cumpromiss en la procedura civila chatta ina buna acceptanza
In'unificaziun dal dretg da procedura civila augmenta decisivamain la segirtad giuridica ed il dretg material po vegnir fatg valair pli decididamain. La regenza beneventa perquai ch'i vegn stgaffì ina procedura civila per l'entira Svizra. A moda fitg positiva prenda ella enconuschientscha che l'organisaziun da las dretgiras vegn surlaschada vinavant als chantuns. Il sboz avant maun è in cumpromiss en cumparegliaziun cun las regulaziuns actualas da las proceduras civilas chantunalas.

Il Grischun è chantun ospitant al Sechseläuten 2004
Mez avrigl 2004 è il chantun Grischun il chantun ospitant a la festa da primavaira da las masteranzas turitgaisas. La regenza ha approvà il concept general. Quest è vegnì sviluppà en collavuraziun cun Grischun vacanzas e sa basa sin trais elements centrals: il til d'uffants, il til da las masteranzas e la plazza dals chantuns (Lindenhof). Ils custs totals da la represchentaziun grischuna a Turitg importan var 480'000 francs. Quels vegnan dal fond da la lottaria naziunala.

Da vischnancas e regiuns
- Tavau: La regenza ha approvà il plan per il svilup dal guaud (PSG) da la vischnanca da Tavau. Il PSG regla l'utilisaziun futura e fixescha las finamiras a lunga vista en la selvicultura sco er las strategias da cultivar.
- Landquart, Duvin, Riein, Versomi e Vrin: La contribuziun chantunala vi dals custs da construcziun da las sereneras da las tschintg vischnancas importan totalmain var 800'000 francs.
- Tschiertschen: Per l'engrondiment da la chanalisaziun survegn la vischnanca ina contribuziun chantunala da var 44'000 francs.

Contribuziuns chantunalas a diversas instituziuns
- Sedrun: Cun ina contribuziun da var 168'000 francs sustegna il chantun la construcziun d'in implant da wellness a Sedrun. La regenza ha plinavant garantì in credit d'agid d'investiziun senza tschains da la confederaziun d'in milliun francs.
- Arosa: La regenza ha approvà ina contribuziun chantunala per il cup mundial da snowboard da la FIS da mez schaner.

Persunal
- Daniel Buschauer, Filisur, è vegnì elegì per il 1. da zercladur 2004 sco referendari per las megliuraziuns en l'uffizi d'agricultura, megliuraziun da structura e mesiraziun.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel