Il misterius chaschunader da numerus stgarps en muntaneras da nursas ed effectivs da selvaschina en Surselva è in luf. Ils organs da surveglianza da chatscha han chattà in excrement datiers d'in fastiz suspectus. L'analisa DNA ha mussà cleramain che quest excrement è d'in luf da derivanza taliana. Uschia sa conferma l'immigraziun da lufs talians en Svizra. Ins po cumprovar che dapi l'onn 1995 èn almain 10 lufs immigrads en Svizra. Igl è il segund luf en il chantun Grischun suenter ch'ins ha observà gia l'onn 2001 in luf mastgel en Val Bregaglia.

Gia dapi plirs mais han ins supponì a basa d'observaziuns e dal cumportament da quest canid ch'in luf saja preschent. Ussa han ins la cumprova scientifica per questa supposziun. Bunas observaziuns da chatschadur(a)s e pastur(a)s han gia inditgà a l'entschatta d'atun ch'i sa tracta tar quest animal dubius d'in luf mastgel. Ils numerus stgarps ch'èn vegnids examinads dals organs da surveglianza da chatscha sustegnevan la supposiziun ch'in luf saja preschent.

Bleras observaziuns mussan ch'il luf passenta l'enviern da la vart sanestra da la Surselva tranter Glion e la vischnanca da Schlans, la quala è stada pertutgada da las malauras.

Gremi: Uffizi da chatscha e pestga
Funtauna: rg Uffizi da chatscha e pestga