Per la cumissiun d'instituziuns politicas dal cussegl naziunal è la
pressa regiunala e locala en privel. Ella vul promover cun in nov
artitgel constituziunal (art. 93 a CF) sia varietad ed independenza.
Cun ina midada da sistem tar la promoziun da la pressa duai oravant tut
vegnir franà il process da concentraziun progressiva.
La regenza grischuna refusa il sboz provisori da la disposiziun da
la constituziun. L'artitgel da las medias en il dretg da concurrenza
(disposiziuns separadas per la controlla da fusiuns tar gasettas e
medias) impedescha - tant sco pussaivel - la creaziun da situaziuns da
monopol. L'exempel dal Grischun mussa che na betg la varietad dals
titels è sa midada, mabain l'ambient da las chasas edituras. Exclusa da
quai è explicitamain la pressa rumantscha. Tut las midadas da las medias
en il Grischun èn succedidas a basa da l'economia dal martgà.
Il sistem da la promoziun da la pressa d'enfin ussa ha reducì il
pretsch dals custs da transport da las gasettas mintg'onn per var 100
milliuns francs (a partir da l'onn 2004 ed enfin l'onn 2007 80 milliuns
francs). La proposta fatga da la cumissiun d'instituziuns politicas dal
cussegl naziunal propona ussa cun quests meds finanzials ina promoziun
directa da la pressa. Independentamain dal resultat da la consultaziun
s'engascha la regenza per ch'i vegnia mess a disposiziun a partir da
l'onn 2007 dapli meds da promoziun en favur da la pressa rumantscha.
Glisch verda dal chantun per la nova sutgera en Samignun
La regenza grischuna sustegna il project da las pendicularas
Samignun SA, numnadamain da remplazzar dus runals entras duas sutgeras
per sis persunas (Alp Trida-Blais Gronda e Planer Salaas-Viderjoch). En
sia proposta per mauns da l'uffizi federal da traffic fa la regenza
attent a l'augment urgent da capacitad e da confort dals dus implants da
remplazzament, il qual vegn ad avair in effect positiv per l'entir
territori da skis.
Da vischnancas e regiuns
- La regenza ha approvà il concept da svilup II da la corporaziun
regiunala Pro Partenz. La radunanza da delegad(a)s da l'organisaziun
regiunala aveva conludì il concept gia l'avust 2002.
- L'aboliziun dal cumin grond en il circul da Surses ha gì per
consequenza ina revisiun parziala da la constituziun cirquitala. La
regenza ha ussa approvà quella.
- Medemamain ha la regenza approvà la nova constituziun communala da
Scharàns.
- En il quartier da Cuoz a Mustér vegn introducida la restricziun da
sveltezza a 30 km/h. La regenza ha approvà la proposta correspundenta da
la vischnanca.
- La ladezza maximala, la tonnascha e l'autezza maximala sin la via
da Fläsch vegnan adattadas (Maiavilla, deviaziun via da Fläsch - Fläsch
en il vitg) da 2,3 sin 2,55 meters resp. da 18 sin 28 tonnas resp. sin
3,6 meters autezza maximala (stretga Maiavilla en il vitg).
- La regenza ha approvà definitivamain il project da construcziun
per il stabiliment nov da la sala da gimnastica sco er per la sanaziun
da la scola veglia a Sarn. Il chantun contribuescha a la construcziun
var 1,7 milliuns francs.
Contribuziuns chantunalas a differentas instituziuns
- Sin il champ da la tgira da monuments ha la regenza deliberà
contribuziuns da ca. 440'000 francs.
- La regenza ha approvà per il "seminari democratic" da l'uniun
federalistica da las gruppas etnicas da la communitad europeica ina
contribuziun unica da 20'000 francs. Il seminari ha l'intent da dar ad
ina gruppa da burgaisas e burgais da la Georgia che represchenta la
politica, las medias e la scienza tranter auter in'invista en la Svizra
multiculturala ed en sias structuras politicas. La gruppa da la Georgia
vegn er a visitar il Grischun. Il seminari stat en direct connex cun
l'onn da giubileum 2003 en il Grischun.
Projects da vias
- Per il mantegiment da construcziuns artifizialas sin la A13
tranter Soazza e Pian San Giacomo (Ponte Lubianéira e Ponte Riale della
Rasiga) sco er sin il traject Ardez - Ftan (punt da Tasna) ha la regenza
deliberà credits da var 1,3 milliuns francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun