La cumissiun predeliberanta dal cussegl grond ha tractà il messadi
da l'iniziativa dal pievel "iniziativa per mantegnair l'egualitad da las
schanzas da la giuventetgna grischuna". La cumissiun propona unanimamain
al cussegl grond d'entrar en il project; latiers duai il parlament
recumandar al pievel da refusar l'iniziativa. Quest conclus ha la
cumissiun prendì cun set encunter trais vuschs. La cumissiun
predeliberanta è sa radunada sut il presidi dal deputà al cussegl grond
Hansjörg Trachsel ed en preschientscha da cusseglier guvernativ Claudio
Lardi.
La cumissiun predeliberanta giuditgescha il concept da linguas
actual dal Grischun - il qual sa funda sin dretg vertent - sco buna
basa. La promoziun da las linguas chantunalas, che vegnan gia instruidas
en la scola primara, en l'instrucziun da linguas estras a la scola
secundara e reala sco er l'introducziun da l'englais saja adattada als
basegns dals giuvenils ed a la situaziun linguistica dal chantun.
L'instrucziun da linguas estras a la scola secundara e reala è
stretgamain colliada cun l'offerta da linguas estras a la scola primara
ed a las scolas continuantas, a las scolas da professiun ed a las scolas
medias. La concepziun vertenta è accordada bain cun las offertas ch'èn
vegnidas prepostadas sin il stgalim superiur da la scola populara sco er
cun las offertas che suondan suenter per l'instrucziun da linguas
estras.
Tenor l'avis da la maioritad da la cumissiun duain vegnir rimnadas
experientschas cun la reglamentaziun vertenta; tar tut quai po il
concept da linguas estras actual vegnir adattà en cas da basegn. Il
stgalim superiur da la scola populara, il qual è plitost chargià cun
linguas, na duai betg vegnir confruntà cun ina nova refurma dal concept
da linguas estras che na purtass ultra da quai nagins avantatgs
decisivs. Il cussegl grond duai er recumandar al pievel da refusar
l'iniziativa perquai che sia realisaziun eventuala fiss colliada cun
grondas difficultads organisatorias e cun gronds custs supplementars,
quai che fa quitads areguard la situaziun precara da las finanzas
chantunalas.
Il cussegl grond vegn a tractar il project durant la sessiun da mars
2003.
Gremi: cumissiun preparatoria dal cussegl grond
Funtauna: rg cumissiun preparatoria dal cussegl grond