A partir dal 1. d'avrigl emettan ils uffizis per il traffic sin via il nov permiss da manischar en format da carta da credit PAC. La midada vegn ad avair consequenzas sin ils custs. In nov permiss custa ussa tar l'emprima emissiun 70 francs (empè da 50 sco enfin ussa). In remplazzament dal permiss da manischar u ina midada en il permiss da manischar custan en l'avegnir 50 francs. La regenza ha approvà la revisiun correspundenta da la "ordinaziun chantunala davart incassar taxas e custs dals possessurs da vehichels a motor e da velos". Quella cuntegna plinavant differentas ulteriuras adattaziuns da las tariffas. Auzadas vegnan tranter auter las taxas per l'examinaziun da tut gener da vehichels, per permissiuns da traffic spezialas, per examens da teoria e d'ir cun auto sco er per ils numers. Sin il champ dals numers vul l'uffizi per il traffic sin via en l'avegnir ademplir sistematicamain giavischs spezials davart numers libers da tschintg e sis cifras. Plinavant ha la regenza concludì d'adattar vers ensi las taxas da la "ordinaziun davart incassar taxas e custs per la navigaziun en il chantun Grischun".

Nova regulaziun tranter il chantun Grischun e la colliaziun dals ospitals ORBV
La regenza ha acceptà ina nova cunvegnientscha tranter il Ente Ospedaliero Cantonale, Bellinzona ed il chantun Grischun. Il contract regla l'ospitalisaziun da pazientas e pazients da la regiun d'ospitals Val Mesauc-Calanca en ils ospitals da la colliaziun dals ospitals "Ospedale Regionale Bellinzona e Valli ORBV". En il ORBV èn colliads ils ospitals San Giovanni a Bellinzona, l'ospital di zona di Leventina, Faido e l'ospital di zona di Blenio, Aquarossa. En spezial han ins resguardà en il contract la posiziun e la muntada da la Clinica San Rocco a Grono. La nova cunvegnientscha na porta nagins custs supplementars per il chantun Grischun.

Center da furmaziun per la sanadad ed ils fatgs socials: la cumissiun da planisaziun è vegnida numnada
La regenza ha nominà per il project da construcziun dal nov center da furmaziun per la sanadad ed ils fatgs socials CSS ina cumissiun da planisaziun. Cusseglier guvernativ Claudio Lardi surpiglia il presidi. La cumissiun da planisaziun ha l'incumbensa d'elavurar in messadi per la planisaziun da construcziun dal CSS. Il project duai vegnir tractà l'avust / il settember 2004 en il cussegl grond.

Da vischnancas e regiuns
- La sedia da l'uffizi da stadi civil fusiunà Moesano, dal "Ufficio di stato civile del Moesano", (vischnancas Arvigo / Cauco, Braggio, Buseno, Cama / Leggia, Castaneda, Grono, Lostallo, Mesocco, Rossa, Roveredo, Sta. Maria C., San Vittore, Selma, Soazza e Verdabbio) è a Sta. Maria C. Er la regenza ha acceptà la proposta correspundenta dals circuls da la Calanca, dal Mesocco e da Roveredo.

Contribuziuns chantunalas a differentas instituziuns
- Per il project integral "Breil" da la vischnanca da Breil ha la regenza approvà ina contribuziun chantunala da var 510'000 francs. Il project cuntegna differentas mesiras: lavurs da tgira, reparaturas sco er engrondiments e construcziuns novas da vias da guaud, segirada da spundas da bovas, drenaschas e deviaziuns d'aua. Ils custs totals èn calculads cun var 2,8 milliuns francs.
- Circa in milliun francs ha la regenza approvà per il project integral "Sumvitg" da la vischnanca da Sumvitg. En il center da quest project stattan differentas mesiras per guauds cun funcziun da protecziun speziala, la construcziun d'in lavuratori forestal, averturas e rempars da lavinas resp. da bovas. L'entir project custa var 5,1 milliuns francs.
- Per la restauraziun e la cumplettaziun da la scola da Lai ha la regenza approvà ina contribuziun da construcziun da maximalmain 65'000 francs.
- Per il giubileum da 200 onns chantun Grischun planiseschan las classas da la scola populara da Mesocco e la terza classa secundara da Roveredo ina represchentaziun multimediala. "Si tenne comunità" scuvra cun giuvenils aspects impurtants da l'istorgia dal chantun Grischun. La regenza ha approvà per quest project ina garanzia da deficit da 30'000 francs. L'entir project è calculà cun var 85'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun