Il center da furmaziun per la sanadad ed ils fatgs socials (CSS)
Cuira sa dat directivas per sviluppar las structuras entaifer ils onns
2003 fin 2007 e fixescha il program logistic per l'onn 2003.
Dapi l'entschatta 2003 èn fusiunadas quatter scolas dal sectur da la
sanadad e dals fatgs socials al center da furmaziun per la sanadad ed
ils fatgs socials. Questa midada ha provocà ina procedura da plirs onns
che duess esser pli accurata pussaivel e che duess progredir en pass
chapaivels. Sut il presidi da cusseglier guvernativ Claudio Lardi ha il
cussegl da scola fixà las directivas per sviluppar structuras adequatas
per il center da furmaziun ils onns 2003 fin 2007 ed il program logistic
per l'onn 2003.
En ina emprima fasa sa tracti d'avrir las structuras da scola da fin
uss e da preparar ellas per l'integraziun ed il svilup. A l'entschatta
vegn creada ina ierarchia orizontala cun ina gronda extensiun directiva.
Quai pussibilitescha ina vasta integraziun da las persunas pertutgadas.
Las manadras ed ils manaders da las partiziuns da las differentas
direcziuns da scolaziun, ils servetschs centrals ed il project refurma
da la furmaziun èn suttamess durant ina fasa da transiziun a la
directura Veronika Niederhauser resp. al vicedirectur Christian Meuli.
Meuli è stà rectur da la scola professiunala da sanadad e tgira da
malsauns e surpiglia la funcziun da vicedirectur durant la fasa da
transiziun enfin la fin 2003. Suenter vegn el a s'orientar da nov.
Il diplom nivel I a temp cumplain cun prioritad sin la geriatria e
tgira da lunga durada a Cuira ed il diplom nivel II cun prioritad sin la
tgira psicosociala a Cazas vegnan resumads a partir dal zercladur 2003
sut ina direcziun communabla. Las duas direcziuns da scolaziun èn
parentadas areguard il cuntegn e sa cumpletteschan plinavant grazia a la
pussaivladad da pudair frequentar suenter avair terminà il diplom nivel
I en in onn reconstituent il diplom nivel II. Davent da l'entschatta da
zercladur 2003 daventa Peter Lehmann schef da secziun per domaduas
direcziuns da scolaziun. Lehmann è stà fin uss directur da scola per il
diplom nivel II cun prioritad sin tgira psicosociala a Cazas. Dieter
Schleuning che maina anc enfin la fin da matg 2003 la scolaziun dal
diplom nivel I, vuless puspè lavurar a temp cumplain sco magister
professiunal al center da furmaziun.
L'onn passà a surpiglià Brigitte Bhend la direcziun da la scola da
tgirunzas da chasa. Maria Dietrich ch'ha manà questa partiziun durant
dudesch onns e ch'è stada dapi l'avust 2000 directura da las partiziuns
betg seminaristicas da la scola da dunnas dal Grischun, vegn a prender
ina nova via professiunala ed a bandunar il center da furmaziun la fin
da l'onn da scola 2003.
Las furmaziuns supplementaras duain vegnir resumadas a partir da
l'onn 2004 sut ina direcziun.
Ils projects interns dal center èn - ultra da la planisaziun da
l'edifizi nov e da la refurma da la furmaziun che s'occupa da
l'organisaziun da novas scolaziuns en il sectur da la sanadad e dals
fatgs socials - la restructuraziun da la recrutaziun, l'infurmaziun
professiunala e la reclama. Per quest intent vegn numnada in gruppa da
project che sa cumpona da represchentantas e represchentants da
differentas direcziuns da scolaziun. Manader dal project è Kurt Michel
che s'occpa da la recrutaziun a l'anteriura scola interconfessiunala da
sanadad e tgira da malsauns dal Grischun a la Comercialstrasse 24 a
Cuira.
A partir dal mars 2003 surpiglia Hanspeter Hänni il post da stab
direcziun. Hänni ha lavurà tranter auter durant diesch onns sco
incumbensà per dumondas d'infurmaziun tar la chanzlia chantunala dal
chantun Grischun. Al center da furmaziun vegn el a s'occupar en emprima
lingia dal ressort lavur da publicitad.
Gremi: Center da furmaziun per la sanadad ed ils fatgs socials
Funtauna: rg Center da furmaziun per la sanadad ed ils fatgs socials