Navigation

Inhaltsbereich

  • Erste Mitteilung
  • Neuen Beitrag einfügen
Il cussegl grond l'ha en maun il zercladur: duess la sanaziun dal budget pertutgar er en ina dimensiun pli vasta la refurma da l'administraziun "GRiforma", pudess quel project da refurma vegnir suspendì in extremis. Cas cuntrari pudess la refurma da l'administraziun vegnir introducida en tut ils secturs fin l'onn 2012. La regenza ha deliberà il rapport davart l'ulteriur andament da la refurma da l'administraziun.

La regenza ha fixà per mauns dal cussegl grond la direcziun fundamentala per la refurma da l'administraziun: "GRiforma" duai vegnir cuntinuada e sviluppada vinavant. Però po la sanaziun da las finanzas dal chantun franar dal tuttafatg il project da refurma, tut tenor quant ferm che "GRiforma" è pertutgà da la uschenumnada "examinaziun da las structuras e da las prestaziuns". Il meglier cas pudess alura vegnir cuntinuada la refurma da l'administraziun en il rom da las resursas restantas.

En cas che las mesiras da spargn na tangheschan betg la refurma da l'administraziun dumonda la regenza il cussegl grond da deliberar fin l'onn 2011 in credit d'impegn da radund 2,5 milliuns francs per custs reals e da laschar metter a disposiziun da la cumissiun da gestiun ulteriuras 6,5 plazzas. Uschia po la refurma da l'administraziun vegnir introducida en tut ils secturs fin l'onn 2012.

Giavischada è la collavuraziun dal cussegl grond
La regenza vul ch'ins enclegia l'introducziun da "GRiforma" en tut ils secturs sco signal cler a favur da la refurma da l'administraziun. Uschia duian vegnir meglierads substanzialmain l'effect da l'activitad administrativa, la prestaziun qualitativa, il pensar economic e la direcziun da l'administraziun. Dals onns 1999 fin 2002 èn vegnids examinads en tschintg uffizis ils princips da la direcziun da l'administraziun efficazia (dal rapport d'evaluaziun dal november 2002 pon ins prender invista qua).

La regenza ha explicitamain giavischà la collavuraziun dal cussegl grond per il process da decisiun davart l'ulteriur andament da la refurma da l'administraziun.

Contribuziun d'investiziun per la Viafier retica
Per l'engrondiment da la staziun da Landquart ha la regenza approvà ina contribuziun d'investiziun da 218'645 francs. Quel project fa part dals moduls d'investiziun da la VIAFIER 2000. La regenza sustegna cun quai il sboz da cunvegnientscha suttamess da l'uffizi federal da traffic. Cun l'inoltraziun dals 6 da december 2002 dumonda la VR da la confederaziun e dal chantun ina contribuziun d'investiziun da totalmain 1'600'000 francs. Da quai surpiglia il chantun Grischun la part approvada.

Da vischnancas e regiuns
- Per la sanaziun da la serenera da las vischnancas d'Arvigo e Selma ha la regenza approvà ina contribuziun chantunala da 772'200 francs. Quai correspunda ad ina part da maximalmain 30% da la summa d'investiziun totala.
- La revisiun parziala dal statut d'organisaziun da la corporaziun regiunala Bregaglia è vegnida approvada da la regenza.

Contribuziuns chantunalas a differentas instituziuns
- Dals meds finanzials da la lottaria naziunala interchantunala ha la regenza deliberà 15'000 francs sco agid da partenza per il project "La Capriola", center da furmaziun per l'integraziun professiunala d'umans cun impediments en la hotellaria e restauraziun dal chantun Grischun.
- L'orchester d'instruments a flad sinfonic dal Grischun survegn da la regenza per sia lavur l'onn 2003 in sustegn finanzial da 30'000 francs.

Persunal
- Michael Caflisch da Tavau è il nov directur dal sectur politica regiunala da l'uffizi per economia e turissem dal Grischun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel