"Electronic Government" u e-government duai vegnir promovì en l'administraziun chantunala dal Grischun cun in process pragmatic, ma cun cleras finamiras. La regenza na vul duvrar l'internet betg mo sco plattafurma d'infurmaziun e communicaziun, mabain er per optimar ils process administrativs vers anen e vers anora. Per quel intent ha ella fixà las directivas strategicas en il palpiri da strategia "E-government en il chantun Grischun - directivas e mesiras per ina cumplettaziun structurada dals servetschs d'e-government da l'administraziun chantunala".

Ils cuntegns da las singulas paginas d'internet ston s'orientar vi dals basegns effectivs dals clients. Latiers na dastga il e-government betg sa fermar tar la simpla preschentaziun d'infurmaziuns en l'internet: il servetsch per la clientella sco tal, process administrativs transparents ed accelerads e l'effizienza dals servetsch da l'administraziun chantunala èn las directivas centralas da la strategia d'e-government. Ultra da quai duai l'utilisaziun da las novas tecnologias d'infurmaziun e communicaziun a l'intern da l'administraziun signalisar confidenza per meds e process dal futur. Finalmain e il process d'e-government er ina schanza per examinar purschidas online cuminaivlas cun l'economia privata.

La regenza approva il nov statut d'organisaziun da la PEB
La regenza ha approvà la revisiun parziala dal statut d'organisaziun da la corporaziun regiunala Pro Engiadina Bassa PEB. Ses president è da nov tant president da la suprastanza da la corporaziun sco er dal cussegl regiunal. Ultra da quai vegn stgaffida ina basa legala per il sustegn da la scola media regiunala, per la pussaivladad da derasar programs da radio e televisiun naziunals ed esters sco er per la collavuraziun ch'exista gia dapi lung temp cun la Corporaziun regiunala Val Müstair.

La Viafier retica sanescha il viaduct da Langwies
Il viaduct da Langwies dal traiect d'Arosa da la Viafier retica vegn sanà. La regenza ha approvà per quai in credit d'investiziun da 540'000 francs. Ils custs totals muntan a trais milliuns francs. Da quels surpiglia la confederaziun 82 pertschient.

Las contribuziuns pauschalas per acquisiziuns dals ospitals èn fixadas
Per acquisiziuns tranter 3000 e 50'000 francs survegnan ils ospitals ordavant per onn ina contribuziun chantunala pauschala. Per l'onn 2003 ha la regenza approvà var 2,3 milliuns francs. Las dumondas dals dudesch ospitals èn sa muntadas a var 4 milliuns francs.

Da vischnancas e regiuns
- Il favrer 2003 han las votantas ed ils votants da Breil concludì la revisiun parziala da la constituziun communala. Latiers è vegnì formulà da nov l'art. 61 da la constituziun (cumposiziun dal cussegl da scola). Questa adattaziun ha ussa er approvà la regenza.
- Per la via chantunala da Mustér-Disla è vegnida auzada la limita dal pais maximal permess da fin ussa 11 a 18 tonnas. L'auzament da la tonnascha vala per entant dal 1. da matg fin ils 31 d'october.

Contribuziuns chantunalas a differentas instituziuns
- La regenza ha approvà diversas contribuziuns chantunalas per projects culturals e scientifics; en tut 106'000 francs per quatter projects.
Projects da vias
- Per proteger la via chantunala da Pigniu d'ulteriuras bovas or da la Val d'Arschella ha la regenza approvà il project per ina dustanza. Il preventiv dals custs importa var in milliun francs.
- Per l'amplificaziun e la sanaziun da la veglia Via da l'Engiadina a Lavin dadens il vitg ha la regenza approvà 215'000 francs.
- Per prolungar il trottuar tranter San Carlo ed Angeli Custodi (traject San Carlo-Raviscè) èn vegnids approvads 119'000 francs.
- Per lavurs urgentas vi dal tunnel Val d'Infern da la via da Calanca ha la regenza approvà ina contribuziun da 500'000 francs.
- Per lavurs d'impressari sin la A13 (traject Bichegia - Pian San Giacomo) èn vegnids approvads var 760'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun