La Svizra vala sco in pajais da pionier en il sectur da la segirezza e da la protecziun da la natira en connex cun ils ruments spezials. Dapi l'onn 1997 reglan las ordinaziuns davart il traffic cun ruments spezials OTRS la dismessa da ruments spezials a l'intern dal pajais sco er lur export a l'exteriur. Mo interpresas cun ina permissiun correspundenta dastgan transportar e dismetter ruments spezials.

Betg mo ruments spezials, mabain er vehichels vegls, laina duvrada e pneus vegls sco er auters ruments da l'industria e dal commerzi pon engrevgiar fermamain l'ambient en cas d'ina dismessa nunadequata. Ultra da quai resulta in grond mantun da quests ruments, quai che munta gia da sasez in problem. Il departament federal da l'ambient, traffic, energia e communicaziun DATEC vul perquai er decretar per questa categoria da ruments prescripziuns da controlla. La nov'ordinaziun davart il traffic cun ruments regla il tractament e la dismessa da rument spezial sco er d'uschenumnads "auters ruments suttamess a la controlla". Ella unescha ultra da quai las prescripziuns da la OTRS cun l'ordinaziun davart la restituziun e la dismessa d'apparats electrics ed electronics ORAAE sco er cun autras cunvegnas ed auters conclus.

La regenza grischuna sustegna da princip questas propostas da revisiun perquai ch'ellas mantegnan e moderniseschan quai ch'è sa cumprovà , sustegnan l'execuziun, faciliteschan la pratica da mintga di ed armoniseschan il grond dumber da las prescripziuns d'enfin ussa, er cun l'Uniun europeica. Explicitamain betg perencletga è la regenza cun la proposta che centers da rimnada publics ston dumandar ina permissiun per pudair prender en consegna ruments spezials. Las expensas supplementaras ch'èn cumbinadas cun quai na sa laschan betg giustifitgar.

Il fond per cumbatter epidemias d'animals è sutdotà - las contribuziuns vegnan adattadas
La regenza ha adattà las contribuziuns annualas da las vischnancas e dals possessurs d'animals per il fond per cumbatter epidemias d'animals: per arments da nov 3,5 enstagl da trais francs per animal, per nursas e chauras da nov in franc enstagl da 50 raps per animal. Las contribuziuns annualas per chavals e portgs sco er las contribuziuns per pievels d'avieuls na vegnan betg midadas. Las adattaziuns valan gia per l'onn 2003. Las entradas supplementaras per il fond per cumbatter epidemias d'animals duain puspè restabilir il saldo da dus milliuns, il qual è prescrit da la lescha. Il saldo actual munta a circa 1,2 milliuns francs. Sulettamain il cas d'anaplasmosa da la stad passada/da l'atun passà ha custà al fond circa 860'000 francs. Il chantun pajà la medem'auta contribuziun sco il total da las entradas supplementaras, però maximalmain 500'000 francs. L'ultima giada èn las tariffas da contribuziun vegnidas adattadas l'onn 1996.

Da vischnancas e regiuns
- Las duas vischnancas da Castrisch, Sevgein e Riein han fusiunà ad ina corporaziun cun dretg public per manar la scolina, la scola primara e las classas pitschnas integradas.
- En il territori da colonisaziun da Maiavilla è a partir d'ussa il tempo 30 per part prescripziun. La regenza ha concedì ina permissiun correspundenta.
- La regenza ha approvà la nova constitiziun da la citad da Farschno - cun excepziun d'in artitgel 19, il qual sto anc vegnir adattà a la legislaziun surordinada. Medemamain ha la regenza approvà la constituziun da la vischnanca da Bravuogn.
- La lescha da taglia communala totalmain revedida da la vischnanca da Lostallo po entrar en vigur. La regenza l'ha ussa medemamain approvada suenter la radunanza communala.
- Ina contribuziun da construcziun maximala da circa 125'000 francs è vegnida approvada per la realisaziun d'in plaz polivalent sper la chasa da scola da Tumegl.
- La regenza ha approvà il project per ina midada da diever da la sala da gimnastica existenta da la citad da Maiavilla en ina scolina da trais partiziuns ed en trais stanzas da scola sco er la contribuziun da construcziun da circa 80'000 francs.

Contribuziuns chantunalas a differentas instituziuns
- La regenza ha approvà 13'500 francs sco contribuziuns da sport-toto. En quest connex èn vegnids resguardads sis petents.
- La publicaziun da la monografia da "Mathias Balzer - Auf der Suche nach der einfachen Wahrheit. Werke 1967 - 1990" da Claudia Klausner vegn sustegnida cun 15'000 francs.

Projects da vias
- Per la nova construcziun da la punt Val da Pitasch tar il Mulin da Pitasch sin il traject da Glion - Val S. Pieder ha la regenza approvà in credit da 430'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun