La rolla impurtanta da l'aua en il chantun Grischun
Durant l'onn internaziunal da l'aua 2003 proclamà da l'ONU duai
vegnir regurdà a la grond'impurtanza da l'aua. Per l'ina vegn ella
duvrada sco forza idraulica ed uschia sco funtauna da gudogn per las
ovras electricas, las vischnancas ed il chantun. Ella sa lascha
commerzialisar sco aua minerala, sco bogn da cura e d'eveniment, sco
purschida da wellness. Ella rinforza il giaschament d'aua sutterrana e
furnescha londerora l'aua da baiver. Ella munta però er in privel
latent e sforza a mesiras cunter auazuns. Ed ella sto vegnir protegida e
mantegnida netta per servir als animals da l'aua sco biotop.
Nossa situaziun geografica areguard l'aua è fitg confortabla. Il
famus gut da plievgia sin il Lunghin va a finir tut tenor il vent u via
la Gelgia ed il Rain en il Mar dal nord, u via l'En ed il Danubi en il
Mar nair u via la Maira ed il Po en il Mar mediterran.Nus stuvain er
avair quità da l'aua, perquai che nus la vulain dar vinavant nunsmerdada
als umans che vivan en regiuns sut nossa.
Activitads variadas e numerusas
A questa muntada duai vegnir patratgà a l'onn internaziunal da l'aua
2003 proclamà da l'ONU. Ed i duain vegnir organisads da purtaders
locals in grond dumber ed ina gronda varietad d'eveniments, ozendi dian
ins events, sper l'aua. Classas da scola vegnan a passentar in di sper
l'aua u en acziun per l'aua u reflectar a moda creativa davart l'aua. A
la Higa vegnan a preschentar ad ina exposiziun speziala la federaziun da
las ovras electricas dal Grischun, l'institut d'assicuranza d'edifizis
(IAE), ils manaschis industrials Cuira (MIC) sco furnitur d'aua da
baiver sco er l'uffizi per la natira e la cuntrada sco partenaris
l'impurtanza multifara da l'aua.
L'engaschament da las scolas per l'aua è spezialmain impurtant.
Perquai èn tut las persunas d'instrucziun vegnidas animadas dal
cusseglier guvernativ Claudio Lardi da deditgar cun lur classas in di da
quest onn a l'aua. Quai po esser sco excursiun, sco concurrenza da
fotografar u schizunt sco teater davart la tematica da l'aua. Segund il
motto "fa insatge bun e rapporta da quai" vegnan las classas a rapportar
da lur activitads. Las meglieras acziuns vegnan premiadas.
Tuts sa participeschan
Igl è ordvart allegraivel da constatar quants eveniments per l'onn
internaziunal da l'aua proclamà da l'ONU che vegnan organisads quest onn
d'organisaziuns partenarias. Uschia ha pudì vegnir cumponì in chalender
d'occurrenzas che cumpiglia var 50 events. Pli probabel èn planisadas u
vegnan anc incitadas ussa dapli. La pagina d'internet sut www.afu.gr.ch
permetta d'acceptar trasora novs events e da porscher uschia in
chalender d'occurrenzas actualisà. Impressiunant è er la varietad dals
partenaris, tutgan tar els tuttina las organisaziuns da l'ambient,
auters uffizis da l'administraziun, las organisaziuns regiunalas, la Pro
Rätia e la Pro Grigioni Italiano sco er funtaunas d'aua minerala,
fatschentas d'energia, sereneras ed auters.
Er la cultura sper l'aua na duai betg vegnir a la curta. Sch'i duai
vegnir promovida en emprima prioritad spezialmain la protecziun da
l'aua, alura èsi bain er en l'interess dal chantun, sche persunas han
success cun lur lavur cun aua sco product. Avair success signifitga bain
da far in plaschair a la clientella, saja quai cun aua minerala
briclanta, cun ina purschida da wellness u mo cun il plaschair da
prender in bogn en l'aua da cura u natirala dal Grischun.
Questa quantitad da partenaris e da purschidas suttastritga quant
gronda che l'impurtanza da l'aua è insumma per noss chantun e che l'onn
da l'aua proclamà da la ONU na passa betg sper il Grischun vi senza
laschar fastizs.
Gremi: uffizi per la natira e la cuntrada
Funtauna: rg uffizi per la natira e la cuntrada