Dacurt ha la cumissiun predeliberanta dal cussegl grond sa
fatschentà cun il messadi davart l'ulteriur andament da la refurma da
l'administraziun GRiforma, e quai sut il presidi dal deputà al cussegl
grond Thomas Schmid ed en preschientscha da cussegliera guvernativa dr.
Eveline Widmer-Schlumpf. En vista da las dumondas avertas davart las
consequenzas da GRiforma ed a basa dal squitsch da spargnar vegn la
cumissiun a far la proposta al cussegl grond da prolungar il project da
pilot per trais onns, collià cun l'incumbensa d'elavurar in'ulteriura
basa da decisiun.
Tenor l'opiniun da la cumissiun predeliberanta èsi il mument memia
baud per far ina decisiun davart ina cumplettaziun u ina interrupziun da
GRiforma. Ella vuless l'emprim sclerir anc dal tuttafatg las dumondas
avertas. Ultra da quai considerescha ella che custs supplementars per
ina extensiun da GRiforma na sajan per il mument betg inditgads. Perquai
vul la cumissiun laschar GRiforma per trais onns sin il stadi existent
(set uffizis). Il temp duai vegnir duvrà per far lavur da scleriment
profunda areguard la decisiun futura e per elavurar concepts per
l'ulteriur andament da la refurma.
Concretamain giavischa la cumissiun ina analisa dals custs e dal
gudogn, en la quala i na vegnan betg mo quantifitgads ils custs, mabain
er il gudogn (per la clientella). Ultra da quai spera ella sin propostas
per sistems d'impuls, cun ils quals ils uffizis e las collavuraturas ed
ils collavuraturs vegnan animads d'optimar la furniziun da prestaziuns
favuraivlas. A maun dal model concret duai vegnir mussà tras il
parlament co ch'il cumond da l'administraziun po vegnir meglierà a lunga
vista, a media vista ed a curta vista. In giudicament dals uffizis duai
dar scleriment nua ed en tge profunditad che GRiforma po vegnir
introducida. A la fin finala duain vegnir realisads tests cun mesiraziun
d'effect e cun ina nova furma da rapport al parlament.
Il cussegl grond vegn a tractar previsiblamain il project en la
sessiun da zercladur.
Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond