La regenza grischuna è perencletga che la confederaziun suttascriva cun il Principadi da Liechtenstein ina cunvegna per l'agid en cas da catastrofas. La cunvegna cumpiglia l'agid vicendaivel en cas da catastrofas u da grevas disgrazias. La confederaziun ha er gia suttascrit cun la Germania, la Frantscha, l'Italia e l'Austria ina cunvegna per l'agid en cas da catastrofas.

Il Forum economic dal Grischun ha in nov program da lavur
Il Forum economic dal Grischun survegn per ses program da lavur 2003 ina contribuziun chantunala da 120'000 francs. Per l'onn 2003 èn planisads projects en il sectur dal turissem: in benchmark cun l'Austria, l'Italia e la Frantscha per destinaziuns svizras orientadas al sport d'enviern sco er in project en il sectur da las abitaziuns da vacanzas. En pli vul il Forum economic dal Grischun sensibilisar la branscha da construcziun grischuna per problematicas existentas. La fundaziun Forum economic dal Grischun è vegnida fundada l'onn 1995.

Ils champiunadis mundials da skis 2003 a San Murezzan vegnan re-elavurads
La vischnanca da San Murezzan vul laschar elavurar in studi davart las consequenzas economicas dals champiunadis mundials da skis 2003. Examinads vegnan tranter auter il svilup en connex cun novs giasts regulars, las pernottaziuns, la svieuta e las frequenzas da las telefericas sco er la valur agiuntada dal turissem. La regenza sustegna quest project cun ina contribuziun chantunala da 30'000 francs.

Ulteriuras contribuziuns per ils donns da malaura 2002
Per ils trais projects da reparaziun suenter las malauras da l'atun 2002 ha la regenza approvà ina contribuziun chantunala da totalmain var 390'000 francs. En las vischnancas da Roveredo, Spleia e da Versomi vegnan sanadas vias, construids cugns alluvials, liberads e chanalisads letgs d'uals sco er segiradas scarpas e zonas d'abitar. La summa totala da las lavurs munta a var 1,9 milliuns francs.

La cunvegna davart l'agid d'investiziun cun la viafier Matterhorn Gottard vegn approvada
La confederaziun ed ils chantuns Vallais, Uri e Grischun sustegnan la sanaziun totala dal traject tranter Hospental e Realp da la viafier Matterhorn Gottard, pli baud viafier Furca-Alpsu, cun ina contribuziun totala da tschintg milliuns francs. La regenza grischuna ha approvà la part dal Grischun a la cunvegna davart l'agid d'investiziun da var 220'000 francs.

Permissiun per trais cursas da velos
Vers la fin d'avust 2003 passan trais occurrenzas da ciclissem "XXAlps 2003" tras il Grischun. La regenza ha concedì per quellas la permissiun da traject e da passadi. Las occurrenzas traversan spezialmain ils territoris dals pass da muntogna Bernina, Malögia, San Bernardin, Alpsu e Spleia.

Da vischnancas e regiuns
- La vischnanca da Mut survegn per la construcziun da sia serenera ina contribuziun chantunala da ca. 118'000 francs.
- La regenza ha approvà la revisiun totala da la lescha communala da taglia da Braggio. La radunanza communala aveva approvà la revisiun l'avrigl.
- Il december 2002 han las votantas ed ils votants da Scuol decidì ina revisiun parziala da la planisaziun locala (lescha da construcziun, plan da zonas Bain San Jon, plan general d'avertura Bain San Jon e plan general da furmaziun Bain San Jon). Questa planisaziun locala revedida è ussa er vegnida approvada da la regenza.

Contribuziuns chantunalas a differentas instituziuns
- La federaziun da tetg "Museums Grischuns - Musei Grigioni - Museen Graubünden" survegn per ses project "Exposiziuns ed occurrenzas en ils museums dal Grischun 2003" ina contribuziun chantunala da 10'000 francs.

Projects da construcziun da vias
- La regenza ha approvà il project per la construcziun nova da la punt sur il "Schergenbach" a Laret sin la via da Samignun tranter Spissermühle e Samignun.

Persunal
Arnold Bachmann è vegnì elegì cun in pensum parzial sco manader adminstrativ da l'ospital da dunnas Fontana, Hans Gasser sco schef da l'uffizi da militar e protecziun civila.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun