Navigation

Inhaltsbereich

  • Erste Mitteilung
  • Neuen Beitrag einfügen
La confederaziun propona ina revisiun da la "ordinaziun dals 27 da zercladur davart l'assicuranza da malsauns" OAM. Las pli impurtantas midadas pertutgan las reservas da las cassas, ils laboratoris, las franschisas, las franschisas elegiblas ed ils rabats da las premias latiers.

Cun reservas minimalas ch'èn unitaras duain en spezial survegnir las cassas pitschnas e las cassas mesaunas dapli libertad d'acziun tar la fixaziun da las premias. La OAM revedida vul er metter fin a tschertas activitads exageradas en il sectur da labors per che rabats d'analisas en uschenumnads laboratoris gronds na vegnan betg plil retegnids a las cassas sco er a las segiradas ed als segirads.

La franschisa ordinaria duai vegnir auzada da 230 a 300 francs e la resalva persunala maximala da 600 ad 800 frans; quai pervia dals augment dals custs dapi l'onn 1996. A la fin vul la nova OAM reducir ils rabats maximals da las premias. Ils rabats da las premias d'enfin uss eran en lur summa pli auts ch'ils custs supplementars che las segiradas ed ils segirads han surpiglià cun la franschisa variabla ch'els han tschernì sezs.

La regenza grischuna è da princip d'accord cun la OAM revedida parzialmain. Criticamain s'exprima ella en sia consultaziun a l'uffizi federal d'assicuranzas socialas davart l'auzament da la participaziun als custs da las segiradas e dals segirads (franschisas, franschisas variablas e resalvas persunalas). La regenza dubita che cun quai possia il svilup dals custs en il sectur da sanadad vegnir influenzà essenzialmain. Ultra da quai perdan las franschisas autas l'attractivitad, sch'ils rabats correspundents da las premias vegnan reducids. La OAM revedida duai entrar en vigur il 1. da schaner 2004.

Decrets chantunals da submissiun vegnan revedids en moda cumplessiva
La regenza grischuna ha dà liber per la consultaziun la lescha da submissiun revedida totalmain, l'ordinaziun da submissiun latiers sco er il conclus da participaziun tar la cunvegna interchantunala revedida davart las acquisiziuns publicas CIAP.

Il motiv central per ina revisiun da las prescripziuns da submissiun vertentas è la cunvegna bilaterala davart las acquisiziuns publicas tranter la Svizra e la UE. Per la realisaziun da quest contract da stadi ha la conferenza dals directurs da construcziun, planisaziun e protecziun da l'ambient deliberà ina nova CIAP che desista da la separaziun d'enfin uss tranter il martgà internaziunal e naziunal. La CIAP revedida na regla da nov betg mo il martgà interchantunal, mabain er singuls aspects en ils secturs che n'eran betg cumpigliads da contracts internaziunals.

Perquai prevesa er la revisiun da las prescripziuns chantunalas da desister da la separaziun d'enfin uss tranter il sectur dal martgà intern ed il sectur da contract internaziunal en favur d'ina concentraziun da las prescripziuns. Quai ha per consequenza ina revisiun dal dretg chantunal da las acquisiziuns. Il sboz da la lescha da submissiun propona tranter auter er in auzament da la valur minimala d'enfin uss. Uschia duain vegnir dubladas las valurs actualas, las qualas permettan ina surdada directa d'ina incumbensa senza l'obligaziun da l'incumbensadra u da l'incumbensader per procurar offertas da concurrenza.

L'ordinaziun d'admissiun nivellescha "a bucca" ed "en scrit"
La regenza ha approvà la revisiun parziala da "l'ordinaziun davart la procedura d'admissiun al stgalim superiur da la scola populara (ordinaziun d'admissiun)". L'ordinaziun vul valitar da nov a moda eguala las singulas parts da l'examen - a bucca, en scrit - en la valitaziun totala da l'examen. La divisiun en l'examen en scrit e l'examen a bucca na vegn perquai betg pli menziunada explicitamain. Ultra da quai vegn fatga en la nov'ordinaziun la differenza tranter las scolaras ed ils scolars da la scola primara e da la scola reala.

La regenza recumonda d'acceptar la cunvegna OEZ
En connex cun in'eventuala recumpra dals stabiliments da las ovras electricas Zervreila han las vischnancas concessiunarias, il chantun e las ovras electricas Zervreila SA OEZ elavurà mez avrigl ina soluziun extragiudiziala. Las OEZ e lur acziunarias ed acziunaris (SN Energie, ATEL e NOK) han approvà questa cunvegna. La regenza recumonda ussa a las vischnancas concessiunarias da las OEZ d'approvar medemamain questa cunvegna.

La cunvegna prevesa da princip ina renunzia da las vischnancas e dal chantun al diever dal dretg da recumpra. Perencunter survegnan las vischnancas concessiunarias ed il chantun ina indemnisaziun sco er ina participaziun finanziala ed energetica a las ovras electricas Zervreila SA OEZ. Questa participaziun è gratuita.

Las reconstrucziuns suenter las malauras 2002 cuntinueschan constantamain
Fin l'onn 2006 vul la regenza investar en in'emprima etappa da realisaziun var 1,4 milliuns francs per las reconstrucziuns e las sanaziuns da vias e dustanzas suenter las malauras da l'atun 2002. En quests secturs èn entradas totalmain 206 annunzias da donns. Ils custs totals dals donns muntan a var 5,8 milliuns francs.

En las vischnancas da Langwies, Alvagni, Schlans, Molinis, Pagig e St. Peter vegnan er instradads suenter las malauras projects da reconstrucziun e da sanaziun. La contribuziun chantunala munta qua a var 540'000 francs tar ina summa totala da 2,2 milliuns francs.

Da vischnancas e regiuns
- La regenza ha approvà las planisaziuns localas revedidas da Mustér (plan general da furmaziun e plan d'avertura "Fontanivas") e da Fideris.
- La nova constituziun da la vischnanca da Castrisch po ussa entrar en vigur. La regenza ha ussa medemamain l'approvada.

Contribuziuns chantunalas a differentas instituziuns
- La regenza ha approvà definitivamain il project per la restauraziun e l'engrondiment da la scola da Lai ed ha deliberà ina contribuziun da construcziun da 65'000 francs.

Projects da vias
- Per differentas lavurs vi da la via tranter Punt Muragl e Puntraschigna sco er vi dal sviament da Flem ha la regenza approvà var in milliun francs.
Persunal
Flurin Caviezel, Cuira, è vegnì elegì sco nov magister da scola media per la scola chantunala.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel